* ina ^itiBÁRA U₄ 14-KAM AN.GE₆ ⸢GAR⸣-ma DINGIR ina KAN₅-šú Á ^imU₁₈.LU AN.TA KAN₅-ma

Á ^imSI.SÁ KI.TA iz-ku : ina UGU re-eš ši-kin qa-bi : taš-ri-tu₄

e-la-nu : KI.TA : šap-la-nu : ina šu-ri-in-ni-šú dele-bat ana ŠÀ 30 KU₄-ma

ina ITI EN.NUN dele-bat ana ŠÀ 30 KU₄-ma : šu-ri-in-ni : qar-nu : MIN<(šu-ri-in-ni)> :

ṣal-mu šá ŠÀ 30 : šá-niš ina šu-ri-in-ni-šú dele-bat ana ŠÀ KU₄ : šu-ri-in-ni :

i-da-tu₄ ana AN.GE₆ : * AN.GE₆ dele-bat ina ^{mulₓ(AB₂)}LÚ.ḪUN.GÁ ana ⸢tar-ṣi⸣ 30 GUB-ma

EN ITI-šú : ^{mulₓ(AB₂)}LÚ.ḪUN.GÁ : ina ŠÀ LUGAL A.GA.DÈ^ki UG₇ iq-bi : IM šá^*

ina ŠU-MIN-ka tu-kal : IM šá^* ana KUR.KUR il-la-ku-ma pi^*-šìr^* ana ŠÀ

ta-qab-bi : EŠ.BAR ana LUGAL A.GA.DÈ^ki ta-nam-din : ^itiBÁRA :

^{mulₓ(AB₂)}LÚ.ḪUN.GÁ KUN ^{mulₓ(AB₂)}LÚ.ḪUN.GÁ : A.GA.DÈ^ki : DINGIR šá ina KAN₅-šú

EN.NUN.U₄.ZAL.LA SAR-ma 1/3-TA.ÀM EN.NUN uḫ-ḫi-ru : ina EN.NUN.U₄.ZAL.LA

AN.GE₆ GAR-ma KAN₅ ŠÚ-ma : 1/3-TA.ÀM : šal-šú šá mu^?-šu^* šá^*-lul-tu₄ EN.NUN

šá-niš 1/3-TA.ÀM šá iq-bu-ú : šal-šú šá SI^* DINGIR^* ana ZÁLAG TAG₄

⸢ad⸣-ri ŠÚ-ma : * ina ^itiGAN U₄ 28-KAM SAG IGI.DU₈.A IGI-ma dele-bat ana ŠÀ 30

KU₄ : ina U₄.NÁ.A dele-bat ana ŠÀ 30 KU₄-ma : 1 me AN.GE₆ DUG₄.GA

[U₄].NÁ.A AN.GE₆ ú^!-kal-lam-ka : ul-tu U₄.NÁ šá ^itiGAN

[ana^?] U₄ AN.GE₆ šá ^itiBÁRA ta-qab-bi : 1 me U₄^mi a-na UD^*-MEŠ^*

[x]-de-e-ti : ki-ṣir šal-šú šá ^itiBÁRA šá E^ú šá ^itiBÁRA 2^*.KAM^* šu^*-u^*

EN.NUN.MURU₄.BA im-šil-ma a-di ZÁLAG DU ^dUTU NU IGI-šú : i-na mi-šil mu-šú

AN.GE₆ SAR-ma a-di la SAG pu-ú-ṣu ZÁLAG-ma : EN ZÁLAG DU ^dUTU

NU IGI-šú [:] a-di UGU nu-um-ri-šú pu-ú-ṣu NU IGI : šá-niš EN ZÁLAG^? DU

^dUTU NU IGI-šú a-di la KUR ^dUTU ZÁLAG-ma NU DÙ : i-šab-biṭ : i-dak-ku^*

[šá]-ba-ṭu : da-a-ku : šá-ga-šú : MIN<(da-a-ku)> : KUR sa-kil-tu₄ : KUR ELAM.MA^ki

[...] ⸢dan⸣-nu : LUGAL AŠ.TE GAL DAB^bat : LUGAL ELAM^*.MA^*ki* AŠ^*.TE^* : šá^*

[...]-⸢x⸣-ma

⸢x x x x x x⸣ [...]

^ḫe-pí DÚR : ú-ša-am-qa-at ta-ba-⸢x x⸣ [x x x x x x x x x]

nak-pa : AN.GE₆ TIL^tú ina MULX(ÁB).MULX(ÁB) GAR-ma : MULX(ÁB).MULX(ÁB) x [x x x x x x x x] x

i-na-dir : i-šá-an-ni : za-ra-nu MÚRU^tì : ḫar-ra-⸢nu šu^*-ut^*⸣ ^d*en^*-líl^* [:] za-⸢ra^*⸣-nu <<x>> 1

: ṭur-ri : * ina ^itiAB U₄ 14-KAM AN.GE₆ GAR-ma SI-MEŠ-šú 1^et la ik-bir 1^et la iq-tin

1/2 ḫab-rat : ina ^{mulₓ(AB₂)}NAGAR AN.GE₆ GAR-ma : EN ITI-šú : ^{mulₓ(AB₂)}SUḪUR.MÁŠ : ^{mulₓ(AB₂)}SUḪUR.MÁŠ : KUR SU.BIR₄^ki

u gu-ti-um : i-ra-sib : i-da-ku : aš-šum ra-sa-bu : da-a-ku : ŠU.NIR

ka-la-šú NU DUL-ma it-bal ina AN.GE₆ TIL^tú ad-ri ŠÚ-ma : KÉŠ^tú : ri-kis ka-la-mu

DINGIR šá ina KAN₅-šú IGI-ma it-bal : šá KAN₅ ŠÚ^ú : LUGAL šá an-na-a iq-bu-šú : LUGAL šá ana

tar-ṣi-šú GISKIM il-li-ku : * ina ^itiŠE U₄ 14-KAM AN.GE₆ GAR-ma SI-MEŠ-šú ina še-e-ri NU <<:>>

i-na-aṭ-ṭa-lu ina GAL-šú in-na-aṭ-ṭa-lu : ina AN.GE₆ TIL^tú šá ⸢LUGAL^?⸣

ú-nam-mi-ru ŠÚ^ú TA : i-na : ^dPAP.SUKKAL KUR-ma KI ^dUTU GUB ^d30 ina

^{mulₓ(AB₂)}SIPA.ZI.AN ana GENNA KUR-ma : AN.GE₆ EN.NUN.U₄.ZAL.LI ú-gam-mir : AN.GE₆

šá a-di TIL EN.NUN.U₄.ZAL.LA GUB : * AN.GE₆ : ina U₄ 7-KAM U₄ 14-KAM U₄ 21-KAM

: ana UGU IGI^!(SAL-)šú u TIL^tú : * MUL-ME EN.NUN-MEŠ AN.GE₆ ú-kal^*-lu^*-mu^*-ka MUL

: šá ina ITI EN.NUN a-na ^d30 TE^ú u DAB^ú MUL-MEŠ : ziq^!(GAZ-)pi šá ina UGU

AN.GE₆ ^d30 GAR^an pi-šèr ana ŠÀ ta-qab-bi : * ni-i-ri : šá A.AB.BA

a-dir ^dé-a a-dir : AN.GE₆ ina ^{mulₓ(AB₂)}GU.LA GAR-ma : ṣa-a-tú u šu-ut KA

mál-su-ut ÉŠ.GÀR šá * U₄ AN ^dEN.LÍL.LÁ šá ŠÀ * ina ^itiBÁRA U₄ 14-KAM AN.GE₆ GAR-ma

DINGIR <ina> KAN₅-šú AL.TIL TA ^gišDA SAR-ma up-puš₄ : GÍD.DA-MEŠ MU-MEŠ

IM ^mBA^šá-^a bu-kúr ^mdINANA-MU-KAM ŠÀ.BAL.BAL ^mÉ.KUR-za-kir ^lúMAŠ.MAŠ qa-ti

^md60-AD-ÙRI DUMU šá ^md60-DU-A A ^mkur-i UNUG^{ki iti}KIN U₄ 3-KAM MU 2-KAM

^mpi-il-pi-is-su LUGAL KUR.KUR