EA 009

a-na ni-ip-ḫu-ur-ri-ri-ia LUGAL KUR ⸢mi⸣-[iṣ-ri-i]

qi₂-bi₂-⸢ma⸣

um-ma bur-ra-bu-ri-ia-aš LUGAL KUR ka-ra-⸢du-ni⸣-ia-aš

ŠEŠ-ka-ma a-na ia-a-ši šu-ul-mu

a-na ka-a-ša E₂-ka DAM.MEŠ-ka DUMU.MEŠ-ka KUR-ka

LU₂.GAL.MEŠ-ka ANŠE.KUR.RA.MEŠ-ka GIŠ.GIGIR.MEŠ-ka da-an-[ni]-⸢iš⸣ lu šu-ul-mu

ul-tu ab-bu-u₂-a-a u₃ ab-bu-ka it-ti a-ḫa-mi-[iš]

ṭa-bu-ta id-bu-bu

šu-ul-ma-na ba-na-a a-na a-ḫa-mi-iš ul-te-bi-i-lu-⸢ni⸣

u₃ me-ri-el-ta ba-ni-ta a-na a-ḫa-mi-iš ul ik-⸢lu⸣-u₂

i-na-an-na a-ḫu-u₂-a-a 2 MA.⸢NA⸣ KU₃.SIG₁₇ a-na šu-ul-ma-ni-ia ul-te-bi-i-la

i-na-an-na-ma KU₃.SIG₁₇ ma-a-ad ma-la ša ab-bi-ka šu-bi-la

u₃ šum-ma mi-i-iṣ mi-ši-el ša ab-bi-ka šu-bi-i-la

am-mi-ni 2 MA.NA KU₃.SIG₁₇ tu-še-bi-e-la

i-na-an-na du-ul-li i-na E₂ DINGIR ma-a-ad u₃ ma-gal

ṣa-ab-ta-ku-u₂-ma ip-pu-uš KU₃.SIG₁₇ ma-a-da šu-bi-la

u₃ at-ta mi-im-ma ša ḫa-aš-ḫa-a-ta i-na KUR-ia

šu-up-ra-am-ma li-el-qu-ni-ik-ku

i-na ku-ri-gal-zu a-bi-ia ki-na-ḫa-a-a-u₂ ga-ab-bi-šu-nu

a-na mu-uḫ-ḫi-šu el-ta-ap-ru-ni um-ma-a a-na qa-an-ni KUR

⸢ku-uš⸣-da-am-ma i ni-ba-al-ki-ta-am-ma

[it]-⸢ti⸣-ka i ni-ša-ki-in a-bu-u₂-a-a

an-ni-ta el-ta-ap-ra-šu-nu-ti

um-ma-a

mu-uš-še-ir it-ti-ia a-na na-aš-ku-u₂-ni

šum-ma it-ti LUGAL ša mi-iṣ-ri-i a-ḫi-ia ta-at-ta-ak-ra-ma

it-ti ša-ni-im-ma ta-at-ta-aš-ka-na

a-na-ku ul al-la-ka-am-ma ul a-ḫa-ba-at-ku-nu-ši-i

ki-i it-ti-ia na-aš-ku-nu a-bu-u₂-a-a

aš-šum a-bi-ka ul iš-mi-šu-nu-ti

i-na-an-na aš-šur-ra-a-a-u₂ da-gi-il pa-ni-ia

a-na-ku ul aš-pu-ra-ak-ku ki-i ṭi-mi-šu-nu

a-na KUR-ka am-mi-ni el-li-ku-u₂-ni

šum-ma ta-ra-aḫ-ma-an-ni ši-ma-a-ti mi-im-ma

la ip-pu-u₂-šu ri-qu-ti šu-nu ku-uš-ši-da-šu-nu-ti

a-na šu-ul-ma-ni-ka 3 MA.NA NA₄.ZA.GIN₃ KUR

u 5 LAL ša ANŠE.KUR.RA.MEŠ ša 5 GIŠ.GIGIR.MEŠ GIŠ.MEŠ

ul-te-bi-la-ak-ku