EA 007

[a-na na-ap-ḫu]-ru-ri-ia LUGAL GAL šar₃ KUR mi-iṣ-[ri-i]

[ŠEŠ-ia qi₂-bi₂]-ma um-ma bur-ra-bu-ri-ia-[aš]

[LUGAL GAL] ⸢LUGAL⸣ KUR ka-ra-^ddu-ni-ia-aš a-⸢ḫu⸣-[ka-ma]

[a-na] ⸢ia⸣-ši u₃ E₂-ia a-na ANŠE.KUR.RA.MEŠ-ia u₃ ⸢GIŠ⸣.[GIGIR.MEŠ-ia]

[a-na] ⸢ra⸣-ab-bu-ti-ia u₃ ma-ti-ia da-an-ni-[iš šu-ul-mu]

a-na a-ḫi-ia u₃ E₂-šu a-na ANŠE.KUR.RA.MEŠ-šu u₃ ⸢GIŠ⸣.[GIGIR.MEŠ-šu]

a-na ra-ab-bu-ti-šu u₃ ma-ti-šu da-an-ni-iš ⸢lu⸣ [šu-ul-mu]

ul-tu UD-mi ša DUMU ši-ip-ri ša a-ḫi-ia ik-[šu-da]

ši-i-ri ul ṭa-ba-an-ni-ma DUMU ši-ip-ri-šu a-a-i-[ka-am-ma]

[i-na] ⸢pa⸣-ni-ia a-ka-la ul i-ku-ul u₃ ši-ka-ra [ul iš-ti]

[^mḫa-a]-u₂ DUMU ši-ip-ri-ka ta-ša-ʾa-al-ma i-⸢ga⸣-[ab-bi-ka]

[ki-i] ⸢ši⸣-i-ri la ṭa-ba-an-ni-ma a-na na-⸢ab⸣-[la-ṭi]

[a-di-na] ⸢mi-im⸣-ma-ma la uš-[ta-la-mu]

[u₃] ki-i ši-i-ri la ṭa-ba-an-ni-ma a-ḫu-u₂-a re-e-⸢ši⸣ [la i-šu-u₂]

a-na-ku ⸢li⸣-ib-ba-ti ša a-ḫi-ia am-[ta]-⸢lab⸣

um-ma-a ki-i ma-ar-ṣa-ku a-ḫu-u₂-a ul iš-[me-e]

am-mi-ni re-e-ši la iš-[ši]

DUMU ši-ip-ri-šu am-mi-ni la iš-pu-ra-am-ma la i-mu-[ra-an-ni]

DUMU ši-ip-ri ša a-ḫi-ia an-ni-ta iq-ta-ba-a

⸢um⸣-[ma]-a ul qa₂-aq-qa₂-ru ki-ir-bu-um-ma

a-ḫu-ka i-še-im-me-ma šu-ul-ma i-ša-ap-pa-ra-ak-ku

ma-tum ru-qa₂-at a-na a-ḫi-ka ma-an-nu i-qa₂-ab-ba-aš-šu-um-ma

šu-ul-ma ḫa-mu-ut-ta i-ša-ap-pa-ra-ak-ku

ki-i ma-ar-ṣa-ta-a a-ḫu-ka i-še-im-me-e-ma

u₃ DUMU ši-ip-ri-šu ul i-ša-ap-pa-ra-ak-ku

a-na-ku a-ka-an-na aq-ta-ba-aš-šu um-ma-a a-na a-ḫi-ia

LUGAL GAL ma-tum ru-uq-tu-u₂ i-ba-aš-ši u₃ ki-ru-ub-tum i-ba-aš-ši

šu-u₂ a-ka-an-na iq-ta-ba-a um-ma-a DUMU ši-ip-ri-ka ša-a-al

ki-i ma-tu₄ ru-qa₂-tu-ma aš-šu-mi-ka a-ḫu-ka la iš-mu-u₂-ma

a-na šu-ul-mi-ka la iš-pu-ra

i-na-an-na ki-i DUMU ši-ip-ri-ia a-ša-lu-ma iq-ba-a

ki-i gi-ir-ru ru-qa₂-a-tum li-ib-ba-at a-ḫi-ia ul am-la-as-⸢sab-ku⸣

u₃ ki-i iq-bu-ni i-na ma-ti ša a-ḫi-ia

ga-ab-bu i-ba-aš-ši u₃ a-ḫu-u₂-a mi-im-ma-ma ul ḫa-ši-⸢iḫ⸣

u₃ i-na ma-ti-ia ga-ab-bu-um-ma i-ba-aš-ši

u₃ a-na-ku mi-im-ma-ma ul ḫa-aš-ḫa-[ku]

a-ma-ta ba-ni-ta ša ul-tu pa-na i-na qa₂-at šar-ra-ni

ma-aḫ-ra-nu-ma šu-ul-ma a-na a-ḫa-mi-iš ni-ša-ap-pa-[ra/ar]

ši-i-ma a-ma-tum i-na bi-ri-ni lu ka-a-a-na-⸢at⸣

[šu]-ul-mi a-na ⸢mu-uḫ⸣-ḫi-⸢ka⸣

x x x ... x x x x x x x x x x x x x x x x x

⸢ša⸣ x x x x x x x x x ša ⸢na-ad-nu⸣ [...]

šu-ul-⸢mi⸣ [x x x x x x] u₃ šu-lum-ka i-⸢qa₂⸣-[ab-bi]

at-ta i-na-an-[na] la-am te-re-ed-du-u₂ ši-it-ta [MU.KAM.MEŠ]

ma-ar ši-ip-ri-ia ta-ak-ta-[la]

DUMU ši-ip-ri-ka ṭi-e-ma al-ta-ka-an-ma al-ta-ap-[ra-aš-šu]

DUMU ši-ip-ri-ia ḫa-mu-ut-ta ṭi-e-ma šu-ku-un-ma li-⸢il⸣-[li-ka]

u₃ ki-i iq-bu-ni-im-ma gi-ir-ru da-an-⸢na⸣-[tu₄]

mu-u₂ ba-at-qu u₃ UD-mu im-[mu]

šu-ul-ma-na ma-ʾa-da ba-na-a ul u₂-še-bi-la-ak-[ku]

4 ma-na NA₄.ZA.GIN₃ ba-na-a ki-i šu-ul-ma-an ga-ti

a-na a-ḫi-ia ul-te-bi-la

u₃ 5 ṣi-mi-it-ta ša si-si-i a-na a-ḫi-ia ul-te-bi-la

ki-i UD-mu iṭ-ṭi-bu DUMU ši-ip-ri-ia ar-ku-u₂ ša il-la-ka

šu-ul-ma-na ba-na-a ma-ʾa-da a-na a-ḫi-ia u₂-še-ib-bi-la

u₃ mi-nu-u₂ ša a-ḫu-u₂-a ḫa-aš-ḫu a-ḫu-u₂-a li-iš-pu-ra-am-ma

ul-tu bi-ti-šu-nu li-il-qu-ni-iš-šu

du-ul-la ṣa-ab-ta-ku-ma a-na a-ḫi-ia aš-pu-ra

a-ḫu-u₂-a KU₃.SIG₁₇ ba-na-a ma-ʾa-da li-še-bi-la-am-ma

a-na du-ul-li-ia lu-uš-ku-un

u₃ KU₃.SIG₁₇ ša a-ḫu-u₂-a u₂-še-ib-bi-la

a-ḫu-u₂-a a-na pa-an qa₂-a-a-pa-ni ma-am-ma la u₂-ma-ša-ar

[ki]-ša a-ḫi-ia li-mu-ra-ma a-ḫu-u₂-a li-ik-nu-uk-ma li-še-bi-la

⸢KU₃⸣.SIG₁₇ ma-aḫ-ra-a ša a-ḫu-u₂-a u₂-še-bi-la ki ša a-ḫu-u₂-a ul i-mu-ur

qa₂-[a]-a-pa-nu-um-ma ša a-ḫi-ia ik-nu-uk-ma u₂-še-bi-lab

40 ⸢ma⸣-na KU₃.SIG₁₇ ša na-šu-ni a-na u₂-tu-ni ki-i aš-⸢ku⸣-[nu]

[10] ⸢ša^?⸣-ar-ru-um-ma ul i-la-[a]

[u₃] ^mṣa-al-mu DUMU ši-ip-ri-ia ša aš-pu-ra-⸢ak⸣-[ku]

[ši]-ni-šu gi-ir-ra-šu ḫa-ab-⸢ta⸣-[at]

⸢il^!⸣-te-it ^mbir₅-ia-ma-za iḫ-ta-ba-[at]

[u₃] ⸢ša⸣-ni-ta gi-ir-ra-šu ^mpa-ma-ḫu-[x]

[ša]-⸢ki⸣-in ma-ti-ka ša ma-at ki-iṣ-ri iḫ-ta-⸢ba⸣-[at]

[u₃] di-na ša-a-šu a-ḫu^!-u₂-a x x

[ki-i] DUMU ši-ip-ri-ia a-na pa-an a-ḫi-ia id-[bu-bu]

[i-na]-an-na ^mṣa-al-mu a-na pa-an a-ḫi-ia li-it-⸢te⸣-[bi]

[u₂]-⸢de⸣-e-šu li-te-ir-ru-ni-⸢iš⸣-[šu]

[u₃] ḫi-bi-il-ta-šu li-ša-al-li-⸢mu⸣-[šu]