Sargon II 007

É.⸢GAL⸣ ^mLUGAL-GI.NA LUGAL GAL MAN dan-nu MAN kiš-šá-tim

LUGAL KUR aš-šur.KI GÌR.NÍTA KÁ.DINGIR.RA.KI MAN KUR šu-me-ri

ù ⸢URI⸣.KI mi-gir DINGIR.MEŠ GAL.MEŠ ^daš-šur ^dAG ^dAMAR.UTU

šar-⸢ru⸣-ut la šá-na-an ú-šat-li-mu-ni-ma zi-kir MU-ia

dam-qu ú-še-ṣu-ú a-na re-še-e-ti ša ZIMBIR.KI

NIBRU.KI KÁ.DINGIR.RA.KI ù bár-sipa.KI za-nin-us-su-un

e-tep-pu-šá ša ERIM.MEŠ ki-din-ni mal ba-šu-ú ḫi-bil-ta-šú-nu a-rib-ma

ú-šá-áš-šík tup-šik-ki BÀD.AN.KI ÚRI.KI UNUG.KI eridu.KI

ARARMA.KI kul-aba₄.KI ki-sik.KI URU.né-med-^dla-gu-da ú-šap-ši-ḫa

UN.MEŠ-šú-un za-kut bal-til.KI ù URU.ḫar-ra-ni šá ul-tu u₄-me

ma-aʾ-du-ti im-ma-šu-ma ki-din-nu-us-su-un ba-ṭil-ta ú-⸢ter⸣

áš-ru-uš-šá DINGIR.MEŠ GAL.MEŠ ina ku-un lìb-bi-šú-nu ip-pal-su-ni-ma

i-na nap-ḫar ma-li-ki dun-nu zik-ru-ti iš-ru-ku-nim-ma ú-šá-te-ru ši-kit-ti ina u₄-um be-lu-ti-ia mal-ku gaba-ra-a-a ul ib-ši-ma ina e-peš MURUB₄ u MÈ ul a-mu-ra mu-né-ḫu

KUR.MEŠ na-ki-ri ka-li-šin kar-pa-niš ú-ḫap-pi-ma ḫa-am-ma-mi ša ar-ba-ʾi ad-da-a ṣer-re-e-ti ḫur-šá-a-ni bé-ru-ti šá né-reb-šú-nu áš-ṭu la mi-nam

ú-pat-ti-ma a-mu-ra du-ru-ug-šú-un ṭu-da-at la aʾ-a-ri pa-áš-qa-a-ti ša a-šar-ši-na šug-lud-du ra-biš e-te-et-ti-qa e-teb-bi-ra na-gab be-ra-a-ti

i-na li-i-ti u da-na-ni šá DINGIR.MEŠ GAL.MEŠ EN.MEŠ-ia ša GIŠ.TUKUL.MEŠ-ia ú-šat-bu-ma ú-ra-as-si-ba na-gab ga-re-ia iš-tu KUR.ia-ad-na-na ša MURUB₄ tam-tim

šá-lam ^dUTU-ši a-di pa-aṭ KUR.mu-ṣu-ri u KUR.mu-uš-ki KUR MAR.TU.KI DAGAL-tum KUR.ḫat-ti a-na si-ḫir-ti-šá nap-ḫa-ar gu-ti-um.KI KUR.ma-da-a-a ru-qu-ú-ti

ša pa-aṭ KUR.bi-ik-ni a-di KUR.el-li-pí KUR.ra-a-ši šá i-te-e KUR.ELAM.MA.KI ša a-aḫ ÍD.IDIGNA LÚ.i-tu-ʾu LÚ.ru-bu-ʾu LÚ.ḫa-tal-lum LÚ.lab-du-du LÚ.ḫa-am-ra-nu

LÚ.ú-bu-lum LÚ.ru-ʾu-u₈-a LÚ.li-iʾ-ta-a-a ša a-aḫ ÍD.su-rap-pi ÍD.uq-né-e LÚ.gam-bu-lu LÚ.ḫi-in-da-ru LÚ.pu-qu-du LÚ.su-te-e ṣa-ab ⸢EDIN⸣

ša KUR.ia-ad-bu-ri ma-la ba-šu-ú a-di URU.sa-am-ʾu-ú-na URU.KÁ-BÀD URU.BÀD-^dte-li-ti URU.ḫi-li-im-mu URU.pil-la-tum URU.dun-ni-^dUTU URU.bu-bé-e URU.DU₆-^dḫum-ba

ša mi-ṣir KUR.ELAM.MA.KI KUR.kár-dun-ía-áš e-liš u šap-liš KUR.É-^ma-muk-ka-ni KUR.É-^mdak-ku-ri KUR.É-^mšil-a-ni KUR.É-^msa-ʾa-al-la si-ḫir-ti KUR.kal-di ma-la ba-šu-ú

KUR.É-^mia-kin₇ šá ki-šad ÍD.mar-ra-ti a-di pa-aṭ NI.TUK.KI mit-ḫa-riš a-bel-ma LÚ.šu-ut SAG.MEŠ-ia LÚ.EN pa-ḫa-a-ti UGU-šú-nu áš-tak-kan-ma ni-ir be-lu-ti-ia

e-mid-su-nu-ti ul-tu SAG LUGAL-ti-ia a-di 15 BALA-ia šá ^mdḫum-ba-ni-ga-áš ELAM.MA.KI-i ina re-bit BÀD.AN.KI áš-ku-na taḫ-ta-šú URU.sa-me-ri-na al-me ak-šud

27 LIM 2 ME 90 UN.MEŠ a-šib ŠÀ-šú áš-lu-la 50 GIŠ.GIGIR.MEŠ ina ŠÀ-šú-nu ak-ṣur-ma ù si-it-tu-ti i-nu-šú-nu ú-šá-ḫi-iz LÚ.šu-ut SAG-ia UGU-šú-nu áš-kun-ma GUN LUGAL maḫ-re-e

e-mid-su-nu-ti ^mḫa-nu-nu MAN URU.ḫa-zi-ti it-ti ^mSIPA-ʾe-e LÚ.tar-tan-nu KUR.mu-ṣu-ri ina URU.ra-pi-ḫi a-na e-peš MURUB₄ u MÈ a-na GABA-ia it-bu-ni

BAD₅.BAD₅-šú-nu am-ḫa-aṣ ^mSIPA-ʾe-e ri-gim GIŠ.TUKUL.MEŠ-ia e-dúr-ma in-na-bit-ma la in-na-mir a-šar-šú ^mḫa-nu-nu LUGAL URU.ḫa-zi-ti ina qa-ti aṣ-bat

ma-da-at-tu ša ^mpi-ir-ʾu-ú MAN KUR.mu-ṣu-ri ^fsa-am-si šar-rat KUR.a-ri-bi ^mit-ʾa-am-a-ra KUR.sa-ba-ʾa-a-a KÙ.GI SAḪAR.BI KUR.RA ANŠE.KUR.RA.MEŠ ANŠE.GAM.MAL am-ḫur

^mki-ak-ki URU.ši-nu-uḫ-ta-a-a ša ni-ir ^daš-šur iṣ-lu-ú-ma ik-lu-ú ta-mar-tuš šá-a-šú ga-du 30 GIŠ.GIGIR.MEŠ-šú 7 LIM 3 ME 50 LÚ.mun-daḫ-ṣe-šú a-na šal-la-ti am-nu-šu

URU.ši-nu-uḫ-tu URU MAN-ti-šú a-na ^mkur-ti-i KUR.tu-un-na-a-a ad-din-ma ANŠE.KUR.RA.MEŠ ANŠE.pa-re-e UGU man-da-at-ti-šú maḫ-ri-ti uṣ-ṣib-ma UGU-šú áš-kun ^mam-ri-is

KUR.ta-bal-a-a ša ina GIŠ.GU.ZA ^mḫul-li-i AD-šú ú-še-ši-bu-šú bi-in-ti it-ti KUR.ḫi-lak-ki la mi-ṣir AD.MEŠ-šú ad-din-šú-ma ú-rap-piš KUR-su ù šu-ú la na-ṣir kit-ti

a-na ^mur-sa-a KUR.URI-a-a ù ^mmi-ta-a MAN KUR.mu-us-ki šá e-ke-me mi-iṣ-ri-ia iš-pu-ra LÚ.A šip-ri ^mam-ri-is it-ti kim-ti ni-šu-ti NUMUN É AD-šú a-šá-red-du-ti KUR-šú

it-ti 1 ME GIŠ.GIGIR.MEŠ-šú a-na KUR aš-šur.KI al-qa-áš-šú LÚ.aš-šur.KI-ú pa-liḫ be-lu-ti-ia ina ŠÀ ú-še-šib LÚ.šu-ut SAG-ia LÚ.EN.NAM UGU-šú-nu áš-kun-ma GUN ma-da-at-tu ú-kin e-li-šú-un

^mdia-ú-bi-iʾ-di KUR.a-ma-ta-a-a ṣa-ab ḫup^†-ši la EN GIŠ.GU.ZA LÚ.ḫat-tu-ú lem-nu a-na LUGAL-ut KUR.a-ma-at-ti ŠÀ-šú ik-pu-ud-ma URU.ar-pad-da URU.ṣi-mir-ra URU.di-maš-qa URU.sa-me-ri-na

it-ti-ia uš-bal-kit-ma pa-a e-da ú-šá-áš-kin-ma ik-ṣu-ra MÈ um-ma-na-at ^da-šur gap-šá-a-ti ad-ke-ma ina URU.qar-qa-ri URU na-ram-i-šú šá-a-šú a-di LÚ.mun-daḫ-ṣe-šú

al-me ak-šud-su URU.qar-qa-ru ina ^dGIŠ.BAR aq-mu šá-a-šú ma-šak-šú a-ku-uṣ ina qé-reb URU.MEŠ šú-nu-ti EN ḫi-iṭ-ṭi a-duk-ma su-lum-mu-u ú-šá-áš-kin 2 ME GIŠ.GIGIR 6 ME ANŠE.pét-ḫal-lum

i-na ŠÀ UN.MEŠ KUR.a-ma-at-ti ak-ṣur-ma UGU ki-ṣir LUGAL-ti-ia ú-rad-di ina u₄-me ^mir-an-zu KUR.man-na-a-a ARAD kan-šu šá-di-id ni-ri-ia šim-tu ú-bi-lu-šu-ma

^ma-za-a DUMU-šú ina GIŠ.GU.ZA-šú ú-še-ši-bu ^mur-sa-a KUR.ur-ar-ṭa-a-a a-na LÚ.KUR.ú-iš-di-iš-a-a LÚ.KUR.zi-kir-ta-a-a LÚ.KUR.mi-si-an-di-a-a LÚ.GAR.KUR.MEŠ

KUR.man-na-a-a GAL.MEŠ a-mat su-ul-le-e u sar₆-ra-a-ti id-bu-ub-šú-nu-ti-ma ina KUR.ú-a-uš KUR-i mar-ṣi ADDA ^ma-za-a DUMU EN-šu-nu id-du-ú ^mul-lu-su-nu

KUR.man-na-a-a ša i-na GIŠ.GU.ZA AD-šú ú-še-ši-bu a-na ^mur-sa-a KUR.ur-ar-ṭa-a-a it-ta-kil-ma 22 URU.ḪAL.ṢU.MEŠ-šú ki-i ṭa-aʾ-tu-ú-ti id-din-šú

i-na ug-gat ŠÀ-ia um-ma-na-at ^daš-šur gap-šá-a-ti ad-ke-ma lab-biš an-na-dir-ma a-na ka-šad KUR.MEŠ šá-ti-na áš-ta-kan pa-ni-ia ^mul-lu-su-nu KUR.man-na-a-a

a-ka-mu ger-ri-ia e-mur-ma URU-uš-šú uṣ-ṣi-ma ina pu-uz-rat KUR-i mar-ṣi a-di-riš ú-šib URU.i-zir-tu URU LUGAL-ti-šú URU.i-zi-bi-a URU.ar-me-et

URU.ḪAL.ṢU.MEŠ-šú dan-na-a-ti ak-šud-ma ina ^dGIŠ.BAR aq-mu di-ik-tu šá ^mur-sa-a KUR.ur-ar-ṭa-a-a i-na KUR.ú-a-uš KUR-i mar-ṣi a-duk-ma 2 ME 50 NUMUN MAN-ti-šú

i-na qa-ti ú-ṣab-bit 55 URU.MEŠ KAL.MEŠ É BÀD.MEŠ ša 8 na-ge-e-šú a-di 11 URU.ḪAL.ṢU.MEŠ-šú mar-ṣa-a-ti ak-šud-ma i-na ^dGIŠ.BAR aq-mu

22 URU.ḪAL.ṢU.MEŠ šá ^mul-lu-su-nu KUR.man-na-a-a e-ki-ma-áš-šum-ma a-na mi-ṣir KUR aš-šur.KI ú-ter-ra 8 URU.ḪAL.ṢU.MEŠ ša KUR.tu-a-ia-di na-ge-e

ša ^mte-lu-si-na KUR.an-di-a-a ak-šud 4 LIM 2 ME UN.MEŠ a-di mar-ši-ti-šú-nu áš-lu-la ^mmi-ta-at-ti KUR.zi-kir-ta-a-a

GIŠ.TUKUL.MEŠ-ia e-dúr-ma šu-ú a-di UN.MEŠ KUR-šú a-na qé-reb ḫur-šá-a-ni in-na-bit-ma la in-na-mir a-šar-šu

URU.pa-ar-da URU LUGAL-ti-šú ina ^dGIŠ.BAR aq-mu 23 URU.MEŠ KAL.MEŠ ša li-me-ti-šú ak-šud-ma áš-lu-la šal-la-su-un

URU.šu-an-da-ḫu-ul URU.zu-ur-zu-uk-ka URU.MEŠ ša KUR.man-na-a-a ša UGU ^mmi-ta-at-ti it-tak-lu ak-šud-ma šal-lat-su-nu áš-lu-la

ša ^mba-ag-da-at-ti KUR.ú-iš-di-iš-a-a ma-šak-šú a-ku-uṣ ^mda-a-a-uk-ku a-di kim-ti-šú as-su-ḫa-am-ma qé-reb KUR.a-ma-at-ti ú-še-šib

^mul-lu-su-nu KUR.man-na-a-a ep-še-et e-tep-pu-šu qé-reb KUR-i mar-ṣi iš-me-ma iṣ-ṣu-riš ip-par-šam-ma iṣ-bat GÌR.II-ia

ḫi-ṭa-ti-šu la mi-na a-bu-uk-ma a-mi-iš gíl-lat-su re-e-ma ar-ši-šu-ma i-na GIŠ.GU.ZA LUGAL-ti-šú ú-še-šib-šú

22 URU.ḪAL.ṢU.MEŠ a-di 2 URU.MEŠ-šú dan-nu-ti ša ul-tu ŠU.II ^mur-sa-a ù ^mmi-ta-at-ti e-ki-ma ad-din-šú-ma ú-taq-qi-na da-li-iḫ-tu KUR-su

ṣa-lam LUGAL-ti-ia DÙ-uš-ma li-i-ti ^daš-šur be-lí-ia UGU-šu áš-ṭur i-na URU.i-zir-ti URU LUGAL-ti-šú ul-ziz aḫ-ra-taš

ša ^mia-an-zu-ú MAN KUR.na-ʾi-i-ri ina URU.ḫu-bu-uš-ki-a URU dan-nu-ti-šú ANŠE.KUR.RA.MEŠ GU₄.MEŠ ù ṣe-e-ni man-da-at-ta-šú am-ḫur

^mdaš-šur-le-ʾi KUR.kar-al-la-a-a ^mit-ti-i KUR.al-la-ab-ra-a-a ša ni-ir ^daš-šur iṣ-lu-ú il-qu-ú še-ṭu-ti

ma-šak ^mdaš-šur-ZU a-ku-uṣ-ma UN.MEŠ KUR.kar-al-la mal ba-šu-ú ù ^mit-ti-i a-di qin-ni-šú as-su-ḫa-am-ma ina qé-reb KUR.a-ma-at-ti ú-še-šib

UN.MEŠ URU.su-uk-ki-a URU.ba-a-la URU.a-bi-ti-ik-na URU.pa-ap-pa URU.lal-lu-uk-nu ul-tu áš-ri-šú-nu as-suḫ-šú-nu-ti-ma ina URU.di-maš-qi u KUR.ḫat-ti ú-še-šib-šú-nu-ti

6 URU.MEŠ šá KUR.ni-ik-sa-am-ma na-gi-i ak-šu-ud ^mGÌR.II-LUGAL LÚ.EN.URU ša URU.šur-ga-di-a ina qa-ti aṣ-bat URU.MEŠ šú-a-tú-nu UGU pi-ḫa-at KUR.par-su-áš ú-rad-di

^mEN-LUGAL-ú-ṣur ša URU.ki-še-si-im šá-a-šú a-di NÍG.ŠU NÍG.GA ni-ṣir-ti É.GAL-šú a-na KUR aš-šur.KI ú-raš-šú LÚ.šu-ut SAG-ia LÚ.EN.NAM UGU URU-šú áš-kun

URU.kar-^dMAŠ.MAŠ MU-šú ab-bi ṣa-lam LUGAL-ti-ia [e]-⸢pu⸣-uš-ma ina qer-bi-šú ul-ziz 6 URU.MEŠ pa-ṭi-šú ak-šud-ma UGU pi-ḫa-ti-šu ú-rad-di

^mki-ba-ba LÚ.EN.URU ša URU.ḫar-ḫa-ar al-me ak-šud^ud šá-a-šú a-di UN.MEŠ KUR-šú a-na šal-la-ti am-nu-šu

URU šu-a-tu a-na eš-šu-ti aṣ-bat UN.MEŠ KUR.MEŠ ki-šit-ti ŠU.II-ia ina ŠÀ ú-še-šib LÚ.šu-ut SAG-ia LÚ.EN.NAM UGU-šú-nu áš-kun

URU.kar-^mMAN-GI.NA MU-šú az-kur GIŠ.TUKUL ^daš-šur EN-ia i-na ŠÀ ú-še-šib ṣa-lam LUGAL-ti-ia ina qer-bi-šú ul-ziz 6 na-gi-i pa-ṭi-šu

ak-šu-ud-ma UGU pi-ḫa-ti-šú ú-rad-di URU.ki-šeš-lu URU.qí-in-da-a-ú URU.É-^mba-ga-ia URU.an-za-ri-a al-me ak-šu-ud

ú-ter-ma a-na eš-šu-ti aṣ-bat URU.kar-^dAG URU.kar-^d30 URU.kar-^dIŠKUR URU.kar-^diš-tar MU-šú-nu ab-bi a-na šuk-nu-uš KUR.ma-da-a-a

li-me-et URU.kar-^mLUGAL-GI.NA ú-dan-ni-na ma-ṣar-tu 34 na-ge-e ša KUR.ma-da-a-a ak-šu-ud-ma

a-na mi-ṣir KUR aš-šur.KI ú-ter-ra na-dan ANŠE.KUR.RA.MEŠ šat-ti-šam UGU-šú-nu uk-tin URU.e-ri-iš-ta-na

a-di URU.MEŠ-ni ša li-me-ti-šú ša KUR.ba-ʾi-it-i-li na-gi-i al-me KUR-ud áš-lu-la šal-la-su-un

KUR.a-ga-zi KUR.am-ba-an-da KUR.ma-da-a-a ša pa-ti LÚ.a-ri-bi ni-pi-iḫ ^dUTU-ši ša man-da-at-ta-šú-nu ik-lu-ú

ap-pul aq-qur i-na IZI áš-ru-up ^mdal-ta-a KUR.el-li-pa-a-a ARAD kan-šu šá-di-id ni-ir ^daš-šur 5 na-gi-i šá pa-ṭi-šu

ib-bal-ki-tu-šu-ma la im-gu-ru be-lut-su a-na ni-ra-ru-ti-šú al-lik na-gi-i šu-a-tu-nu al-me ak-šud^ud UN.MEŠ a-di mar-ši-ti-šú-nu

it-ti ANŠE.KUR.RA.MEŠ la mi-nam šal-la-tu ka-bit-tu a-na qé-reb KUR aš-šur.KI áš-lu-la ^mur-za-na URU.mu-ṣa-ṣir-a-a ša a-na ^mur-sa-a

KUR.ur-ar-ṭa-a-a it-tak-lu-ma i-mi-šu ar-du-tu i-na gi-piš um-ma-ni-ia URU.mu-ṣa-ṣi-ru a-ri-biš ak-tùm^†-ma

ù šu-ú a-na šu-zu-ub ZI-šú e-den-nu-uš-šú ip-par-šid-ma KUR-šu e-li a-na URU.mu-ṣa-ṣi-ri šit-lu-ṭiš e-ru-um-ma

DAM-su DUMU.MEŠ-šú DUMU.MUNUS.MEŠ-šú NÍG.ŠU NÍG.GA ni-ṣir-ti É.GAL-šú ma-la ba-šu-ú it-ti 20 LIM 1 ME 70 UN.MEŠ a-di mar-ši-ti-šú-nu

^dḫal-di-a ^dba-ag-bar-tum DINGIR.MEŠ-šú a-di NÍG.GA-šú-nu ma-ʾa-at-ti šal-la-ti-iš am-nu ^mur-sa-a LUGAL KUR.ur-ar-ṭi

ḫe-pe-e URU.mu-ṣa-ṣir šá-lal ^dḫal-di-a DINGIR-šu iš-me-ma i-na ŠU.II ra-ma-ni-šú ina GÍR AN.BAR šib-bi-šú na-piš-ta-šú ú-qat-ti

UGU KUR.ur-ar-ṭi a-na paṭ gim-ri-šá ki-ḫul-lu-ú ú-šab-ši UN.MEŠ a-ši-ib lìb-bi-šá e-mì-da si-pit-tu ù ṣer-ḫa ^mtar-ḫu-na-zi

URU.me-lid-da-a-a tu-qu-un-tu iḫ-šu-uḫ-ma a-de-e DINGIR.MEŠ GAL.MEŠ e-bu-uk-ma ik-la-a ta-mar-tuš ina ug-gat ŠÀ-ia URU.me-lid-du

URU LUGAL-ti-šú a-di URU.MEŠ ša li-⸢mi⸣-ti-šú kar-pa-niš aḫ-pi šá-a-šú a-di DAM-šú DUMU.MEŠ-šú DUMU.MUNUS.MEŠ-šú ni-ṣir-ti É.GAL-šú ma-la ba-šu-ú

it-ti 5 LIM šal-lat LÚ.qu-ra-di-šú ul-tu qé-reb URU.DU₆-ga-rim-me URU dan-nu-ti-šú ú-še-ṣa-áš-šum-ma šal-la-ti-iš am-nu-šu

URU.DU₆-ga-rim-me a-na eš-šu-ti aṣ-bat LÚ.su-te-e ṣa-ab GIŠ.PAN KUR-ti ŠU.II-ia KUR.kam-ma-nu a-na si-ḫir-ti-šú ú-šá-aṣ-bit-ma ú-rap-pi-šá ki-sur-ri

KUR šu-a-tu ina ŠU.II LÚ.šu-ut SAG-ia am-nu-ma il-ku tup-šik-ku ki-i ša ^mkun-zi-na-nu LUGAL maḫ-ri ú-kin UGU-šú ^mtar-ḫu-la-ra KUR.gúr-gu-ma-a-a

ša ^mmut-tal-lum IBILA-šú i-na GIŠ.TUKUL ú-ra-as-si-bu-šu-ma ba-lum ṭè-me-ia i-na GIŠ.GU.ZA-šú ú-ši-bu-ma ú-ma-ʾe-ru KUR-su i-na šu-ḫu-uṭ lìb-bi-⸢ia⸣

it-ti GIŠ.GIGIR GÌR.II-ia u ANŠE.pét-ḫal-lì-ia ša a-šar sal-me ⸢Á⸣.II-a-a la ip-par-ku-ú

a-na URU.mar-qa-si ḫi-it-mu-ṭiš al-lik ^mmut-tal-lu IBILA-šú a-di kim-ti KUR.É-^mpa-ʾa-al-la

mal ba-šu-ú it-ti KÙ.GI KÙ.BABBAR NÍG.ŠU É.GAL-šú ša ni-ba la i-šu-ú šal-la-ti-iš am-nu-šú

UN.MEŠ KUR.gúr-gu-me a-na paṭ gim-ri-šá a-na eš-šu-ti a-šur LÚ.šu-ut SAG-ia

LÚ.EN.NAM UGU-šú-nu áš-kun-ma it-ti UN.MEŠ KUR aš-šur.KI am-nu-šú-nu-ti

^ma-zu-ri LUGAL URU.as-du-di a-na la na-še-e bil-ti

ŠÀ-šu ik-pu-ud-ma a-na LUGAL.MEŠ-ni li-me-ti-šu

ze-ra-a-ti ⸢KUR⸣ aš-šur.KI iš-pur áš-šu ḪUL-tum e-pu-šu

UGU UN.MEŠ [ma]-⸢ti⸣-šu be-lut-su ú-nak-kir

^ma-ḫi-mi-⸢ti⸣ [ŠEŠ] ta-lim-šu a-na LUGAL-ti UGU-šú-nu áš-kun-ma

LÚ.ḫa-at-te ⸢da⸣-bi-ib ṣa-lip-ti be-lut-su i-ze-ru-ma ^mia-ma-ni la EN GIŠ.GU.ZA

šá ki-ma šá-a-šú-nu-ma pa-laḫ be-lu-ti la i-du-ú ú-rab-bu-ú UGU-šú-un

i-na šu-ḫu-uṭ lib-bi-ia gi-piš ERIM.ḪI.A-ia

ul ú-paḫ-ḫir-ma ul ak-ṣu-ra ka-ra-ši

it-ti LÚ.qu-ra-di-ia šá a-⸢šar⸣ [sa]-al-me

Á.II-a-a la ip-par-ku-ú a-na URU.as-du-di

⸢al⸣-lik-ma ù šu-ú ^mia-ma-ni a-lak^† ger-ri-ia

ru-qiš iš-me-ma a-na i-te-e KUR.mu-ṣu-ri

ša pa-aṭ KUR.me-luḫ-ḫa in-na-⸢bit⸣-ma la in-na-mir

a-šar-šú URU.as-du-du URU.gi-im-tu URU.as-du-di-im-mu

al-me ak-šud DINGIR.MEŠ-šú DAM-su DUMU.MEŠ-šú DUMU^†.MUNUS.MEŠ-šú

NÍG.ŠU NÍG.GA ni-ṣir-ti É.GAL-šú it-ti UN.MEŠ KUR-šú

a-na šal-la-ti am-nu URU.MEŠ šu-a-⸢tu⸣-nu a-na eš-šu-ti

aṣ-[bat] UN.MEŠ KUR.KUR.MEŠ ki-šit-ti qa-ti-ia

ša qé-reb x [x x ni-pi]-iḫ ^dUTU-ši ⸢ina⸣ lìb-bi ⸢ú⸣-[še-šib-ma LÚ.šu-ut SAG-ia LÚ.EN].⸢NAM⸣ UGU-[šú-nu áš-kun it]-ti ⸢UN⸣.MEŠ KUR aš-šur.KI am-nu-šú-nu-ti-⸢ma⸣ i-šu-ṭu ab-šá-ni LUGAL KUR.me-luḫ-[ḫa]

ša i-na qé-reb ⸢LUM⸣ x [x] KUR.ú-⸢ri^?⸣-iṣ-ṣú a-šar la aʾ-a-ri ú-ru-uḫ [x x x x x x x (x x)] SU [ša ul-tu UD].⸢MEŠ⸣ ru-qu-ti a-di i-^dnanna AD.MEŠ-šú a-na LUGAL.MEŠ-ni AD.MEŠ-ia

rak-bu-šú-un ⸢la⸣ [iš]-pu-ru a-na šá-ʾa-al šul-me-šú-un da-na-an ⸢^daš-šur⸣ ^d[AG] ⸢^d⸣AMAR.UTU a-na ru-[qi^?] ⸢iš^?-me^?⸣-[ma^? pul]-ḫi me-lam-me LUGAL-ti-ia ik-tu-mu-šu-ma it-ta-bi-ik-šú ḫa-at-tú

i-na ṣi-iṣ-ṣi ù iz-qa-[ti bi]-re-tú AN.BAR id-di-šum-ma a-na qé-reb KUR aš-šur.KI ḫar-ra-ni ru-⸢uq^?-ti⸣ a-di maḫ-ri-ia ub-[lu-ni ^m]⸢mut⸣-tal-lum ⸢LÚ⸣.kúm-mu-ḫa-a-a LÚ.ḫat-tu-ú lem-nu la a-dir zik-ri DINGIR.MEŠ ka-pi-du

lem-né-e-ti da-bi-bu ṣa-⸢lip⸣-ti UGU ^mar-giš-ti LUGAL KUR.ur-ar-ṭi ne-ra-ri la mu-še-zi-bi-šú it-ta-kil-ma bil-tu man-da-at-tú na-dan šat-ti-šú ú-⸢šab⸣-ṭil-ma ik-la-a ta-mar-tuš i-na ug-gat lib-bi-ia

it-ti GIŠ.GIGIR GÌR.II-ia ù ANŠE.pét-ḫal-li-ia šá a-šar sa-al-me Á.II-a-a la ip-par-ku-ú aṣ-ṣa-bat ú-ru-uḫ-šú a-ka-mu ger-ri-ia e-mur-ma URU-uš-šú uṣ-ṣi-ma la in-na-mir a-šar-šú URU šú-a-tu

a-di 62 URU.MEŠ KAL.MEŠ ša li-me-ti-šú al-me ak-šud DAM-su DUMU.MEŠ-šú DUMU.MUNUS.MEŠ-šú NÍG.ŠU NÍG.GA mim-ma aq-ru ni-⸢ṣir-ti⸣ [É.GAL]-šú it-ti UN.MEŠ KUR-šú ⸢áš-lu⸣-lam-ma la e-zi-ba ma-nam-ma na-gu-ú šú-a-tú a-na eš-šu-ti

aṣ-bat UN.MEŠ KUR.É-^mia-kin₇ ki-šit-ti ŠU.II-ia ina lìb-bi ú-še-šib LÚ.šu-ut SAG-ia ⸢LÚ.EN⸣.NAM UGU-šú-nu ⸢áš⸣-kun ni-⸢ir⸣ be-lu-ti-ia ú-kin UGU-šú-un 1 ME 50 GIŠ.GIGIR 1 LIM 5 ME ANŠE.pét-ḫal-lum 20 LIM ERIM.MEŠ GIŠ.PAN

1 LIM na-áš GIŠ.ka-ba-bi u GIŠ.⸢az⸣-ma-re-e i-na lìb-bi-šú-nu ak-ṣur-ma ú-šad-gi-la pa-nu-uš-šú i-na u₄-me ^mdal-ta-a^† LUGAL KUR.⸢el⸣-li-pi^† ARAD kan-še šá-di-id ni-ri-ia ú-ṣu-rat a-dan-ni ik-šu-da-áš-šum-ma

il-li-ka ú^†-ru-⸢uḫ⸣ mu-ú-ti ^mni-bé-e ^miš-pa-ba-a-ra DUMU.MEŠ NIN₉.MEŠ-⸢šú⸣ [a]-⸢na⸣ a-šab GIŠ.GU.ZA LUGAL-ti-šú KUR-su DAGAL-tum iš-te-niš i-zu-zu-ma ip-pu-šú ta-ḫa-zu ^mni-bé-e áš-šú túr-ri gi-mil-li-šú

UGU ^mšu-túr-^dna-ḫu-un-di LÚ.ELAM.MA.KI-i ur-ri-ḫa DUMU šip-ri kit-ru id-din-šu-ma il-li-ka re-⸢ṣu⸣-us-su^{† m}iš-⸢pa⸣-ba-a-ra a-na túr-ri gi-mil-li ù e-ṭe-er na-piš-ti-šú

i-na su-pe-e ù te-me-qi ú-ṣal-la-an-ni-ma e-riš-an-ni kit-ru 7 LÚ.šu-ut SAG.MEŠ-ia a-di um-ma-na-te-šú-nu a-na tur-ri gi-mil-li-šú áš-pur ša ^mni-bé-e a-di um-ma-an e-la-mi^†-i

re-ṣi-i-šú i-na URU.mar-ú-bi-iš-ti iš-ku-nu taḫ-ta-a-šú ^miš-pa-ba-a-ra i-na GIŠ.GU.ZA-šú ú-še-šib-ma KUR.el-li-pi da-li-iḫ-tú ú-taq-qin-ma ú-šad-gi-la pa-nu-uš-šú ^mdAMAR.UTU-IBILA-SUM.NA

DUMU ^mia-kin₇ LUGAL KUR.kal-di ze-er né-er-ti ḫi-ri-iṣ GAL₅.LÁ lem-ni la pa-li-ḫu zi-kir EN EN.EN UGU ÍD.mar-ra-ti gu-pu-uš e-di-i it-ta-kil-ma a-de-e DINGIR.MEŠ GAL.MEŠ i-bu-uk-ma ik-la-a

ta-mar-tuš ^mdḫum-ba-ni-ga-áš LÚ.ELAM.MA.KI-ú a-na re-ṣu-ti is-ḫur-ma gi-mir LÚ.su-te-e ṣa-ab EDIN it-ti-ia uš-bal-kit-ma ik-ṣu-ra ta-ḫa-zu in-neš-ram-ma a-na KUR EME.GI₇ u URI.KI

12 MU.AN.NA.MEŠ ki-i la lìb-bi DINGIR.MEŠ KÁ.DINGIR.RA.KI URU ^dEN.LÍL.LÁ DINGIR.MEŠ i-bel ù iš-pur i-na qí-bit ^daš-šur AD DINGIR.MEŠ ù EN GAL-i ^dAMAR.UTU uš-te-še-ra ṣi-in-di-ia ak-ṣu-ra uš-ma-ni

a-na LÚ.kal-di LÚ.KÚR ak-ṣi a-la-ku aq-bi ù šu-ú ^mdMES-A-SUM.NA a-lak ger-ri-ia iš-me-ma ḫat-tu rama-ni-šú im-qut-su-ma ul-tu qé-reb KÁ.DINGIR.RA.KI a-na URU.iq-bi-^dEN ki-ma su-tin-ni

ip-pa-riš mu-šiš URU.MEŠ-šú aš-bu-te ù DINGIR.MEŠ a-šib ŠÀ-šú-un ki-i iš-tén ú-paḫ-ḫir-ma a-na URU.BÀD-^mia-kin₇ ú-še-rib-ma ú-dan-ni-na ker-ḫe-e-šú LÚ.gam-bu-lum LÚ.⸢pu-qu⸣-du LÚ.da-mu-nu

LÚ.ru-ʾu-u₈-a LÚ.ḫi-in-da-ru ik-te-ram-ma a-na qer-bi-šú ú-še-rib-ma ú-šá-aṣ-ri-ḫa MÈ áš-la.TA.ÀM la-pa-an BÀD-šú GAL-i ú-né-es-si-ma 2 ME ina 1.KÙŠ DAGAL ḫa-ri-ṣi iš-kun-ma

1 1/2 NINDA ú-šap-pil-ma ik-šu-da A.MEŠ nag-bi bu-tuq-tu ul-tu qé-reb ÍD.pu-rat-ti ib-tu-qa ú-šar-da-a ta-mir-tuš ú-šal-lu₄ URU a-šar naq-ra-bi A.MEŠ ú-mal-li-ma ú-bat-ti-qa

ti-tur-ri šu-ú a-di re-ṣi-šú ERIM.MEŠ MÈ-šú i-na bi-rit ÍD.MEŠ ki-ma MUŠEN.ku-mi-i kul-tar LUGAL-ti-šú iš-kun-ma ik-ṣu-ra uš-ma-an-šú LÚ.⸢mun⸣-daḫ-ṣe-ia ⸢UGU⸣ ÍD.MEŠ-šú a-ra-niš ú-šap-riš-ma