Sargon II 009

É.GAL ^mLUGAL-GI.NA LUGAL GAL-ú LUGAL dan-nu LUGAL KIŠ LUGAL KUR aš-šur.KI

GÌR.NÍTA KÁ.DINGIR.RA.KI LUGAL KUR EME.GI₇ ù URI.KI mi-gir DINGIR.MEŠ GAL.MEŠ

RE.É.UM ke-e-nu ša ^daš-šur ^dAG ^dAMAR.UTU LUGAL-ut la šá-na-an

ú-šat-li-mu-šu-ma zi-kir šu-mì-šu ú-še-ṣu-ú

a-na re-še-e-ti šá-kin šu-ba-re-e ZIMBIR.KI NIBRU.KI

KÁ.DINGIR.RA.KI mu-šá-áš-šík tup-šik-ki BÀD.AN.KI ÚRI.KI eridu.KI

ARARMA.KI kul-la-ba.KI ki-sik.KI né-med-^dla-gu-da.KI

mu-šap-ši-ḫu UN.MEŠ-šú-un ka-ṣir ki-din-nu-ut bal-til.KI ba-ṭil-ta

ša UGU URU.ḫar-ra-na AN.DÙL-la-šú it-ru-ṣu-ú-ma

ki-i ṣa-ab ^da-nim ù ^dda-gan iš-ṭu-ru za-kut-su-un

zi-ka-ru dan-nu ḫa-lip na-mur-ra-ti ša a-na šum-qut

na-ki-ri šu-ut-bu-u GIŠ.TUKUL.MEŠ-šú šá-kin taḫ-te-e ^mdḫum-ba-ni-ga-áš

LÚ.ELAM.MA.KI-i mu-šak-niš KUR.man-na-a-a KUR.kar-al-lu KUR.an-di-a

KUR.zi-kir-tú URU.ki-še-si-im URU.ḫar-ḫar KUR.ma-da-a-a KUR.el-li-pi

e-mid-du ni-ir aš-šur mu-šaḫ-rib KUR.ur-ar-ṭi URU.mu-ṣa-ṣir šá ^mur-sa-a

KUR.ur-ar-ṭa-a-a i-na pu-luḫ-ti-šú GAL-ti i-na GIŠ.TUKUL

ra-ma-ni-šú ú-qat-ta-a na-piš-tuš šá-lil ma-li-ki URU.gar-ga-miš

KUR.a-ma-at-ti KUR.kúm-mu-ḫi URU.as-du-du LÚ.ḫa-at-te-e lem-nu-ti

la a-dir zik-ri DINGIR.MEŠ da-bi-bu ṣa-lip-ti ša UGU gi-mir KUR.MEŠ-šú-nu

LÚ.šu-ut SAG.MEŠ-šú a-na LÚ.NAM-ú-ti iš-tak-ka-nu-ma it-ti UN.MEŠ KUR aš-šur.KI

im-nu-šu-nu-ti sa-pi-in URU.sa-me-ri-na ka-la KUR.É-^mḫu-um-ri-a KUR.kas-ku

ka-šid KUR.ta-ba-lu gi-mir KUR.É-^mpu-ru-ta-áš KUR.ḫi-lak-ku ša ina URU.ra-pi-ḫi

BAD₅.BAD₅ KUR.mu-uṣ-ri iš-ku-nu-ma ^mḫa-a-nu-nu LUGAL URU.ḫa-zi-ti im-nu-ú šal-la-ti-iš

na-pi-iʾ URU.ši-nu-uḫ-ti ṭa-rid ^mmi-ta-a LUGAL KUR.mu-us-ki mu-ter ḫal-ṣi KUR.qu-e

ek-mu-ti ša URU.ia-am-na-a-a ša MURUB₄ tam-tim ki-ma nu-ú-ni i-ba-ru

na-si-iḫ ^mgu-un-zi-na-nu KUR.kam-ma-nu-u-a ù ^mtar-ḫu-la-ra KUR.gúr-gu-ma-a-a

ša gi-mir KUR.MEŠ-šú-nu e-ki-mu-ma a-na mi-ṣir KUR aš-šur.KI ú-ter-ra mu-šak-niš

7 LUGAL.MEŠ-ni ša KUR.ia-aʾ na-ge-e ša KUR.ad-na-na ša ma-lak 7 u₄-me i-na MURUB₄ tam-ti

ša šùl-mu ^dUTU-ši šit-ku-nat šu-bat-sún ka-šid KUR.ra-a-ši mu-šak-niš LÚ.pu-qud-du LÚ.da-mu-nu

a-di URU.la-ḫi-ri šá KUR.ia-ad-bu-ri e-mid-du ab-šá-an-šu šá-kin dáb-de-e ^mdAMAR.UTU-IBILA-SUM.NA

LUGAL KUR.kal-di a-a-bu lem-nu ša ki-i la lìb-bi DINGIR.MEŠ šar-ru-ut KÁ.DINGIR.RA.KI e-pu-šu-ma tak-šu-du

GAL-tú qa-as-su na-si-iḫ šur-uš URU.BÀD-^mia-ki-in-ni

URU tuk-la-ti-šú GAL-a ša ADDA.MEŠ LÚ.mun-daḫ-ṣe-šú i-na sa-pan

tam-ti ú-gar-ri-nu gu-ru-un-niš iš-me-ma ^mú-pe-ri LUGAL dil-mun.KI

ša ma-lak 30 KASKAL.GÍD i-na MURUB₄ tam-tim šá ṣi-it ^dUTU-ši ki-ma nu-ú-ni

nar-ba-ṣu šit-ku-nu-ma iš-šá-a ta-mar-tuš LUGAL it-pe-šu

muš-ta-bil a-mat da-mì-iq-ti ša a-na šu-šu-ub na-me-e

na-du-ti ù pe-te-e ki-šub-bé-e za-qáp ṣip-pa-a-ti iš-ku-nu

ú-zu-un-šu i-na u₄-me-šu-ma i-na UGU nam-ba-ʾi šá GÌR.II

KUR.mu-uṣ-ri KUR-e e-le-nu ni-na-a.KI URU e-pu-uš-ma URU.BÀD-^mMAN-GIN

az-ku-ra ni-bit-su GIŠ.KIRI₆.MAḪ-ḫu tam-šil KUR.ḫa-ma-ni ša gi-mir ḫi-bi-iš-ti

KUR.ḫat-ti GURUN KUR-e DÙ-šú-un qé-reb-šú ḫu-ur-ru-šu ab-ta-ni i-ta-tuš

ša 3 ME 50.ÀM mal-ki la-bi-ru-ti ša el-la-mu-u-a be-lu-ut

KUR aš-šur.KI e-pu-šu-ma il-ta-nap-pa-ru ba-ʾu-lat ^dEN.LÍL

a-a-um-ma i-na lìb-bi-šú-nu a-šar-šú ul ú-maš-ši-ma šu-šu-ub-šú

ul il-ma-du ḫe-re-e ÍD-šú za-qáp ṣip-pa-te-šú ul iz-kur a-na šu-šu-ub

URU šá-a-šú zuq-qú-ur BÁRA.MAḪ-ḫi at-ma-an DINGIR.MEŠ GAL.MEŠ ù É.GAL.MEŠ

šu-bat be-lu-ti-ia ur-ru mu-šu ak-pu-ud aṣ-rim-ma

e-pe-su aq-bi i-na ITI še-mé-e u₄-mu

mit-ga-ri i-na ITI ^dkulla UD.ÈŠ.ÈŠ

GIŠ.al-lu ú-šat-ri-ik-ma ú-šal-bi-na

li-bit-tu i-na ITI.NE a-ra-aḫ

mu-kin te-me-en URU ù É ša gi-mir ṣal-mat SAG.DU

a-na ri-mì-ti-ši-na i-pat-ti-qa ṣu-lu-lu

e-li KÙ.GI KÙ.BABBAR URUDU ni-siq-ti NA₄.MEŠ ḫi-bi-iš-ti

KUR.ḫa-ma-ni pe-el-šú ú-šat-ri-ṣa uš-še-e-šú ad-di-ma

ú-kin lib-na-as-su pa-rak-ki ra-áš-bu-ti

ša ki-ma ki-ṣir gi-né-e šur-šu-du a-na ^dé-a

^d30 ^dnin-gal ^dUTU ^dAG ^dIŠKUR ^dMAŠ e-pu-šá

qer-bu-uš-šu É.GAL.MEŠ ZÚ AM.SI GIŠ.ESI GIŠ.TÚG

GIŠ.mu-suk-kan-ni GIŠ.ere-IGI GIŠ.ŠUR.MÌN GIŠ.dup-ra-ni

GIŠ.ŠIM.LI u GIŠ.bu-uṭ-ni i-na qí-bi-ti-šú-nu

ṣir-ti a-na mu-šab šar-ru-ti-ia ab-ni-ma

GIŠ.ÙR.MEŠ GIŠ.ere-IGI GAL.MEŠ e-li-šin ú-šat-ri-ṣa

GIŠ.IG.MEŠ GIŠ.ŠUR.MÌN GIŠ.mu-suk-kan-ni mé-se-er URUDU nam-ri

ú-rak-kis-ma ú-rat-ta-a né-reb-šin

É ap-pa-a-ti tam-šil É.GAL KUR.ḫat-ti ša i-na li-šá-an

KUR MAR.TU.KI É ḫi-la-ni i-šá-as-su-šu

ú-še-pi-šá mé-eḫ-ret KÁ.MEŠ-ši-in

8 UR.MAḪ tu-ʾa-a-me šu-ut 1 ŠÁR GÉŠ.U 6 UŠ 50.ÀM GUN

mal-tak-ti URUDU nam-ri ša i-na ši-pir ^dnin-á-gal ip-pat-qu-ma

ma-lu-ú nam-ri-ri 4 tim-me GIŠ.ere-IGI šu-ta-ḫu-te ša 1 NINDA.TA.ÀM

ku-bur-šu-un bi-ib-lat KUR.ḫa-ma-ni UGU ur-maḫ-ḫe-e

ú-kin-ma dáp-pi ku-lul ba-bi-ši-in e-mid

UDU.MEŠ šad-di ^dLAMMA MAḪ.MEŠ šá NA₄ KUR-i eš-qí

nak-liš ap-tiq-ma a-na er-bet-ti šá-a-ri ú-šá-aṣ-bi-ta

SI.GAR-ši-in as-kup-pi NA₄.pi-li GAL.MEŠ da-ád-me

ki-šit-ti qa-ti-ia ṣe-ru-uš-šin ab-šim-ma a-sur-ru-ši-in

ú-šá-as-ḫi-ra a-na tab-ra-a-ti ú-šá-lik ŠÁR ŠÁR ŠÁR ŠÁR GÉŠ.U GÉŠ.U GÉŠ.U 1 UŠ

1 1/2 NINDA 2 KÙŠ mi-še-eḫ-ti BÀD-šú áš-kun-ma e-li KUR-i zaq-ri

ú-šar-ši-da te-em-me-en-šú i-na re-e-ši ù ar-ka-a-ti

i-na ṣe-li ki-lal-la-an mé-eḫ-ret 4 IM.MEŠ 8 KÁ.GAL.MEŠ ap-te-e-ma

^dUTU mu-šak-šid er-nit-ti-ia ^dIŠKUR mu-kin ḪÉ.GÁL-li-ia

šu-mu KÁ.GAL ^dUTU ù ^dIŠKUR ša IGI-et IM.KUR.RA az-kur ^dEN.LÍL mu-kin

iš-di URU-ia ^dNIN.LÍL mu-di-šá-at ḫi-iṣ-bi zík-ri KÁ.GAL ^dBAD

ù ^dNIN.LÍL ša IGI-et IM.SI.SÁ am-bi ^da-nu mu-šal-lim ep-šet

qa-ti-ia ^diš-tar mu-šam-me-ḫa-at UN.MEŠ-šú ni-bit KÁ.GAL ^da-nim

ù ^diš-tar ša IGI-et IM.MAR.TU áš-kun ^dé-a muš-te-šir nag-bi-šú

^dbe-let-DINGIR.MEŠ mu-rap-pi-šat ta-lit-ti-šú šu-mu KÁ.GAL ^dé-a ù ^dbe-let-DINGIR.MEŠ šá IGI-et

IM.U₁₈.LU aq-bi-ma ^daš-šur mu-šal-bir pa-le-e LUGAL e-pi-ši-šu

na-ṣir um-ma-ni-šu BÀD-šú ^dnin-urta mu-kin te-me-en a-li-šu

a-na la-bar UD.MEŠ ru-qu-ú-ti šal-ḫu-šú ba-ʾu-lat ar-ba-ʾi li-šá-nu

a-ḫi-tu at-me-e la mit-ḫur-ti a-ši-bu-ut KUR-i ù ma-a-ti ma-la ir-te-ʾu-ú

ZÁLAG DINGIR.MEŠ EN gim-ri ša i-na zi-kir ^daš-šur EN-ia ina me-tel ši-bir-ri-ia áš-lu-la

pa-a 1-en ú-šá-áš-kin-ma ú-šar-ma-a qé-reb-šú DUMU.MEŠ KUR aš-šur.KI mu-du-ut i-ni

ka-la-ma a-na šu-ḫu-uz ṣi-bit-ti pa-laḫ DINGIR ù LUGAL LÚ.ak-li

LÚ.šá-pi-ri ú-ma-ʾe-er-šú-nu-ti ul-tu ši-pìr URU ù É.GAL.MEŠ-ia

ú-qat-tu-ú DINGIR.MEŠ GAL.MEŠ a-ši-bu-ut KUR aš-šur.KI i-na qer-bi-ši-na

aq-re-e-ma ta-šil-ta-ši-na áš-kun ša mal-ki ṣi-it ^dUTU-ši ù e-reb ^dUTU-ši

KÙ.GI KÙ.BABBAR mim-ma aq-ru si-mat É.GAL.MEŠ šá-ti-na ta-mar-ta-šú-nu ka-bit-tú am-ḫur

DINGIR.MEŠ a-ši-bu-ut URU šá-a-šu mim-ma lip-ta-at ŠU.II-ia li-im-ma-ḫi-ir-ma pa-nu-uš-šú-un

a-šab ki-iṣ-ṣi-šú-un ù kun-nu BALA.MEŠ-ia liq-bu-ú du-rí da-rí

ša ep-šet qa-ti-ia ú-nak-ka-ru-ma bu-un-na-ni-ia ú-saḫ-ḫu-ú

uṣ-ṣu-rat e-ṣe-ru ú-šam-sa-ku-ma si-ma-ti-ia ú-pa-áš-šá-ṭu ^d30 ^dUTU

^dIŠKUR ù DINGIR.MEŠ a-šib lìb-bi-šú MU-šú NUMUN-šú i-na KUR lil-qu-tú-ma

i-na KI.TA LÚ.KÚR-šú li-še-ši-bu-uš ka-meš