Sargon II 011

É.GAL ^mLUGAL-GI.NA MAN kiš-šá-ti MAN KUR aš-šur.KI

GÌR.NÍTA KÁ.DINGIR.RA.KI MAN KUR ⸢EME⸣.GI₇ ù URI.KI

LUGAL ša i-na tu-kul-ti ^daš-šur ^dAG ^dMES

iš-tu KUR.ia-ad-na-na ša MURUB₄ tam-tim

šá-lam ^dUTU-ši a-di pa-aṭ KUR.mu-ṣu-ri

ù KUR.mu-uš-ki KUR MAR.TU.KI DAGAL-tim

KUR.ḫat-ti a-na si-ḫir-ti-šá nap-ḫar gu-ti-um.KI

KUR.ma-da-a-a ru-qu-ti šá pa-aṭ KUR.bi-ik-ni

KUR.el-li-pí KUR.ra-a-še šá i-te-e KUR.ELAM.MA.KI

na-gab LÚ.a-ri-me^† a-ši-ib a-aḫ ÍD.IDIGNA

ÍD.su^†-rap-pi ÍD.uq-né-e a-di URU.dun-ni-^dUTU

URU.bu-bé-e URU.DU₆-^dḫum-ba ša mi-ṣir

KUR.ELAM.MA.KI KUR.kár-dun-ía-áš e-liš ù^† šap-liš

gi-mir KUR.kal-di mal ba-šu-ú KUR.É-^mia-ki-ni

šá GÚ^† ÍD.mar-ra-te a-di pa-aṭ NI.TUK.KI

mit-ḫa-riš i-bí-lu-ma LÚ.šu-ut SAG.MEŠ-šu

LÚ.EN.NAM.MEŠ UGU-šú-nu iš-tak-ka-nu-ma

ni-ir be-lu-ti-šú e-mid-su-nu-ti ina u₄-me-šú-ma

ki-i ṭè-em DINGIR-ma i-na GÌR.II KUR.mu-uṣ-ri

e-le-nu NINA.⸢KI⸣ URU DÙ-uš-ma URU.BÀD-^mLUGAL-GIN

iz-ku-ra ni-bit-su É.GAL ZÚ AM.SI GIŠ.ESI

GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN

GIŠ.dup-ra-ni GIŠ^†.ŠIM.LI ù GIŠ.bu-uṭ-ni

a-na mu-šab LUGAL-ti-šú qer-bu-uš-šú

ib-ni-ma GIŠ.ÙR.MEŠ GIŠ.EREN GAL.MEŠ e-li^†-šin

ú-šat-ri-ṣa GIŠ.IG.MEŠ GIŠ.ŠUR.MÌN GIŠ.mu^†-suk-kan-ni

me-⸢se⸣-er URUDU nam-ri ú-rak-kis-ma ú-rat-ta-a

né-reb-⸢šin⸣ É ⸢ap⸣-pa-a-ti tam-šil É.GAL KUR.ḫat-ti

šá ina li-šá-an KUR MAR.TU.KI É ḫi-la-a-ni

i-šá-as-su-šú ú-še-pi-šá mé-eḫ-ret KÁ.⸢MEŠ⸣-šin

8 UR.MAḪ.MEŠ tu-ʾa-a-me šu-ut 1 ŠÁR GÉŠ.U 6 UŠ 50.ÀM

GUN mal-tak-ti URUDU nam-ri šá ina ši-pir

^dnin-á-gal ip-pat-qu-ma ma-lu-ú

nam-ri-ir-ri 4 GIŠ.tim-me GIŠ.EREN šu-ta-ḫu-te^†

ša 1 NINDA.TA.ÀM ku-bur-šú-un bi-ib-lat KUR.ḫa-ma-ni

UGU pirig-gal-le-e ú-kin-ma GIŠ.dáp-pi ku-lul

KÁ.MEŠ-šin e-mid UDU.MEŠ šad-di ^dLAMMA MAḪ.MEŠ

šá NA₄ KUR-i eš-qí nak-liš ib-ni-ma a-na er-bet-ti

šá-a-ri ú-šá-aṣ-bi-ta SI.GAR-šin as-kup-pi

NA₄.⸢pi⸣-i-⸢li⸣ GAL.MEŠ da-ád-me ki-šit-ti

qa-ti-šu ṣe^†-ru^†-uš-šin ib-šim-ma

a-sur-ru-šin ú-šá-as-ḫi-ra a-na tab^†-ra-a-ti

ú-šá-lik da-⸢ád⸣-me^† ma-ti-tan šá iš-tu ṣi-taš

a-di šil-la-an ⸢ina e⸣-mu-uq ^daš-šur ik-šu-du-ma

ina ⸢ši-pir⸣ LÚ.⸢ùr^†⸣-ra-ku-ti i-[na] ⸢qé⸣-reb ⸢É⸣.GAL.⸢MEŠ⸣

šá-ti-na iš-[tak]-⸢ka^†⸣-[na si-ma]-a-ti