Sargon II 012

É.GAL ^mLUGAL-GI.NA LUGAL kiš-šá-ti

LUGAL KUR aš-šur.KI GÌR.NÍTA KÁ.DINGIR.RA.KI

LUGAL KUR EME.GI₇ ù ak-ka-di-i

LUGAL ša i-na tu-kul-ti ^daš-šur

^dAG ^dAMAR.UTU iš-tu KUR.ia-ad-na-na

ša MURUB₄ tam-tim ša šá-lam ^dUTU-ši

a-di pa-aṭ KUR.mu-ṣu-ri

ù KUR.mu-uš-ki KUR MAR.TU.KI

DAGAL-tim KUR.ḫat-ti a-na si-ḫir-ti-šá

nap-ḫar gu-ti-um.KI KUR.ma-da-a-a

ru-qu-ti šá pa-aṭ KUR.bi-ik-ni KUR.el-li-pí

KUR.ra-a-ši ša pa-aṭ KUR.ELAM.MA.KI

na-gab LÚ.a-ri-me a-ši-ib a-aḫ

ÍD.IDIGNA ÍD.su-rap-pi ÍD.uq-né-e

a-di URU.dun-ni-^dUTU URU.bu-bé-e URU.DU₆-^dḫum-ba

šá mi-ṣir KUR.ELAM.MA.KI KUR.kár-dun-ía-áš

e-liš ù šap-liš gi-mir KUR.kal-di

mal ba-šu-ú KUR.É-^mia-kin₇ ša ki-šá-di

ÍD.mar-ra-ti a-di pa-aṭ NI.TUK.KI

mit-ḫa-riš a-be-el-ma LÚ.šu-ut SAG.MEŠ-ia

a-na LÚ.EN.NAM-ú-ti UGU-šú-nu

áš-tak-kan-ma ni-ir be-lu-ti-ia

e-mid-su-nu-ti ina u₄-me-šú-ma ina ba-ḫu-la-te

na-ki-ri ki-šit-ti ŠU.II-ia šá ^daš-šur

^dAG ^dAMAR.UTU a-na GÌR.II-ia ú-šak-ni-šú-ma

i-šu-ṭu ab-šá-a-ni ki-i ṭè-em DINGIR-ma

ina GÌR.II KUR.mu-uṣ-ri e-le-en NINA.KI

ina bi-bíl lìb-bi-ia URU DÙ-uš-ma

URU.BÀD-^mMAN-GIN az-ku-ra ni-bit-su

É.GAL ZÚ AM.SI GIŠ.ESI GIŠ.TÚG

GIŠ.mu-suk-kan-ni GIŠ.ere-ni GIŠ.ŠUR.MÌN GIŠ.dáp-ra-ni

GIŠ.ŠIM.LI ù GIŠ.bu-uṭ-ni a-na mu-šab

LUGAL-ti-ia qer-bu-uš-šú ab-ni-ma

^daš-šur EN GAL-ú ù DINGIR.MEŠ a-ši-bu-ut

KUR aš-šur.KI ina qer-bi-ši-in aq-re-e-ma

UDU.SISKUR.MEŠ tak-bit-ti KÙ.MEŠ ma-ḫar-šú-un

aq-qí ša mal-ki kib-rat LÍMMU-i ša a-na ni-ir

be-lu-ti-ia ik-nu-šu-ma e-ṭè-ru

nap-šat-sún it-ti LÚ.EN.NAM.MEŠ ma-ti-ia

LÚ.ak-li LÚ.šá-pi-ri NUN.MEŠ

LÚ.šu-ut SAG.MEŠ u šá-tam-me

ta-mar-ta-šu-nu

ka-bit-tu am-ḫur

i-na qé-re-ti ú-še-šib-šú-nu-ti-ma

áš-ta-kan-na ni-gu-tú