Sargon II 041

É.GAL ^mMAN-GI.NA GAR ^dBAD NU.ÈŠ aš-šur MAN dan-nu MAN ŠÚ MAN KUR aš-šur.KI

MAN kib-rat LÍMMU-i mi-gir DINGIR.MEŠ GAL.MEŠ šá-kin šu-ba-re-e

ZIMBIR.KI NIBRU.KI KÁ.DINGIR.RA.KI ḫa-a-tin en-šu-te-šú-nu

e-pir a-ke-e mu-šal-li-mu ḫi-bíl-ti-šú-un ka-ṣir

ki-din-nu-ut bal-til.KI ba-ṭi-il-tu mu-šá-áš-ši-ik tup-šik-ki

BÀD.AN.KI mu-šap-ši-ḫu UN.MEŠ-šú-un an-ḫa-a-ti le-ʾi DÙ mal-ki

šá UGU URU.ḫar-ra-na AN.DÙL-la-šú it-ru-ṣu-ma ki-i ṣa-ab ^da-nim

^dda-gan iš-ṭu-ru za-kut-su MAN šá ul-tu u₄-mi be-lu-ti-šú

gaba-ra-a-šú la ib-šu-ma i-na qab-li ù ta-ḫa-zi la e-mu-ru

mu-né-ḫu KUR.KUR DÙ-ši-na ki-ma ḫaṣ-bat-ti ú-daq-qi-qu-ma ḫa-am-ma-mi

šá ar-ba-ʾi id-du-ú ṣer-re-e-ti LÚ.šu-ut SAG.MEŠ-šú LÚ.GAR-nu-ti

UGU-šú-nu iš-tak-ka-nu-ma bíl-tu ma-da-at-tú ki-i šá áš-šu-ri

e-mid-su-nu-ti i-na mé-re-ši-ia DAGAL ù ḫi-is-sa-at GEŠTU.II-ia

pal-ka-a-ti šá ^dé-a ^dbe-let-DINGIR.MEŠ UGU MAN.MEŠ-ni AD.MEŠ-ia

ú-šá-te-ru ḫa-sis-si i-na bi-bíl lìb-bi-ia i-na GÌR.II KUR.mu-uṣ-ri KUR-i

i-na re-bit NINA.KI URU e-pu-uš-ma URU.BÀD-^mMAN-GIN MU-šú ab-bi

pa-rak-ki ra-áš-du-ti a-na ^dé-a ^d30 ^dUTU ^dIŠKUR ù ^dnin-urta

i-na qer-bi-šú nak-liš^* ú-šab-ni-ma É.GAL ZÚ AM.SI GIŠ.ESI GIŠ.TÚG

GIŠ.MES.MÁ.KAN.NA GIŠ.ere-IGI GIŠ.ŠUR.MÌN GIŠ.dáp-ra-ni GIŠ.LI GIŠ.bu-uṭ-ni

a-na mu-šab MAN-ti-ia ab-ni-ma É ḫi-la-an-ni tam-šil É.GAL KUR.ḫat-ti

i-na KÁ.MEŠ-šin ap-ti-iq-ma GIŠ.ÙR.MEŠ GIŠ.ere-IGI GIŠ.ŠUR.MÌN ú-kin

ṣe-e-ru-šin e-ma-am-mi tam-šil bi-nu-ut KUR-i ù tam-tim šá NA₄ BABBAR-e

i-na né-re-bé-ti-ši-na ul-ziz-ma GIŠ.IG.MEŠ GIŠ.ŠUR.MÌN GIŠ.MES.MÁ.KAN.NA

ú-rat-ta-a KÁ.MEŠ-šin BÀD-šú ki-ma ki-iṣ-rat KUR-i

ú-šar-šid-ma UN.MEŠ KUR.KUR mal ^dUTU ir-te-ʾu-ú ki-šit-ti

ŠU.II-ia i-na lìb-bi ú-še-šib DINGIR.MEŠ GAL.MEŠ a-ši-bu-ut AN-e

KI-tim ù DINGIR.MEŠ a-ši-bu-ut URU šá-a-šú e-peš URU

šul-bur qer-bi-šú iš-ru-ku-in-ni a-na da-riš