Sargon II 043

^mLUGAL-GI.NA šá-ak-nu ^dEN.LÍL NU.ÈŠ ba-ʾi-it ^da-šur ni-šit IGI.II ^da-nim ù ^dda-gan

LUGAL GAL-ú LUGAL dan-nu LUGAL KIŠ LUGAL KUR aš-šur.KI LUGAL kib-rat ar-ba-ʾi mi-gir DINGIR.MEŠ GAL.MEŠ

RE.É.UM ke-e-nu ša ^da-šur ^dAMAR.UTU LUGAL-ut la šá-na-an ú-šat-li-mu-šu-ma zi-kir MU-šu ú-še-eṣ-ṣu-ú a-na re-še-e-te

šá-kin šu-ba-re-e ZIMBIR.KI NIBRU.KI KÁ.DINGIR.RA.KI ḫa-a-tin en-šu-te-šú-nu mu-šal-li-mu ḫi-bil-ti-šu-un

ka-ṣir ki-din-nu-tu bal-til.KI ba-ṭi-il-tu mu-šá-áš-ši-ik tup-šik-ki BÀD.AN.KI mu-šap-ši-ḫu UN.MEŠ-šu-un

le-ʾi DÙ mal-ki ša UGU URU.ḫar-ra-na AN.DÙL-la-šu it-ru-ṣu-ma ki-i ṣa-ab ^da-nim u ^dda-gan iš-ṭu-ru za-kut-su

zi-ka-ru dan-nu ḫa-lip na-mur-ra-ti ša a-na šum-qut na-ki-ri šu-ut-bu-ú GIŠ.TUKUL.MEŠ-šu

LUGAL ša ul-tu u₄-um be-lu-ti-šu mal-ku gaba-ra-a-šu la ib-šu-ma i-na qab-li ù ta-ḫa-zi la e-mu-ru mu-né-eḫ-ḫu

KUR.KUR DÙ-ši-na ki-ma ḫaṣ-bat-ti ú-daq-qi-qu-ma ḫa-am-ma-mi ša ar-ba-ʾi id-du-ú ṣer-re-e-tu

ḫur-šá-a-ni bé-ru-ú-ti ša né-reb-šú-nu áš-ṭu la-a mi-na ip-tu-ma e-mu-ru du-ru-ug-šu-un

ṭu-da-at la aʾ-a-ri pa-áš-qa-a-ti ša a-šar-ši-na šug-lud-du e-ta-at-ti-qu-ma e-te-eb-bi-ru na-gab be-ra-a-ti

iš-tu KUR.ra-a-ši mi-ṣir KUR.e-lam-ti LÚ.pu-qu-du LÚ.da-mu-nu URU.BÀD-ku-ri-gal-zi URU.ra-pi-qu

mad-bar DÙ.A.BI a-di na-ḫal KUR.mu-uṣ-ri KUR a-mur-re-e DAGAL-tum KUR.ḫat-ti a-na si-ḫir-ti-šá i-be-lu

iš-tu KUR.ḫa-áš-mar a-di KUR.ṣi-bar pat-ti KUR.ma-da-a-a ru-qu-ti ša ṣi-it ^dUTU-ši KUR.nam-ri KUR.el-li-pí

KUR.É-ḫa-am-ban KUR.par-su-a KUR.ma-an-na-a-a KUR.ur-ar-ṭu KUR.kas-ku KUR.ta-ba-lum a-di KUR.mu-us-ki ik-šu-du GAL-tum qa-a-su

LÚ.šu-ut SAG.MEŠ-šú šak-nu-ti UGU-šú-nu iš-tak-ka-nu-ma bil-tu ma-da-at-tu ki-i ša áš-šu-ri e-mid-su-nu-ti

eṭ-lu qar-du ša i-na re-bit BÀD.AN.KI it-ti ^mdḫum-ba-ni-ga-áš LUGAL KUR.e-lam-ti in-nam-ru-ma iš-ku-nu taḫ-ta-a-šu

na-si-iḫ LÚ.KUR.te-sa-a-a mu-pal-li-ku gu-un-ni-šu šá-lil KUR.tu-uʾ-mu-na ša LÚ.na-sik-šú-nu i-pi-du-ma ur-ru-ú ma-ḫar LUGAL KUR.kal-di

mu-ri-ib KUR.É-ḫu-um-ri-a rap-ši ša i-na URU.ra-pi-ḫi BAD₅.BAD₅-ú KUR.mu-uṣ-ri GAR-nu-ma ^mḫa-a-nu-nu LUGAL URU.ḫa-zi-te ka-mu-us-su ú-še-ri-ba URU.aš-šur

ka-šid LÚ.ta-mu-di LÚ.i-ba-di-di LÚ.mar-si-i-ma-ni LÚ.ḫa-ia-pa-a ša si-it-ta-šú-nu in-né-et-qa-am-ma ú-šar-mu-ú qé-reb KUR.É-ḫu-um-ri-a

le-ʾi tam-ḫa-ri ša i-na MURUB₄ tam-tim KUR.ia-am-na-a-a sa-an-da-niš ki-ma nu-ú-ni i-ba-ru-ma ú-šap-ši-ḫu KUR.qu-e ù URU.ṣur-ri

LUGAL da-pi-nu mu-par-ri-iʾ ar-ma-ḫi URU.ši-nu-uḫ-ti mu-nam-mi da-ád-mi-šá ša ^mki-ak-ki LUGAL-šú-nu ú-la-i-ṭu gi-iš-gi-ni-iš

mu-né-es-si KUR.É-pu-ru-ta-áš ša ^mam-ba-ri-is ma-lik-šú-nu da-mi-iq-ti ^mLUGAL-GI.NA im-šu-ma UGU LUGAL KUR.ur-ar-ṭi u KUR.mu-us-ki it-tak-lu

i-da-an pag-la-a-te ṭa-rid ^mmi-ta-a LUGAL KUR.mu-us-ki mu-ter ḫal-ṣi KUR.qu-e ek-mu-te mu-rap-pi-šu pu-lu-un-ge-šu-un

qit-ru-du la a-dir tuq-ma-te na-si-iḫ šur-uš KUR.a-ma-at-te ša ma-šak ^mi-lu-bi-iʾ-di ḫa-am-ma-ʾi-i iṣ-ru-pu na-ba-si-iš

na-bi-iʾ KUR.gar-ga-miš KUR.ḫa-at-te-e lem-ni ša ^mpi-si-i-ri da-gíl pa-ni-šú-nu da-bi-ib ṣa-lip-te ik-šu-du GAL-tum qa-a-su

mu-šaḫ-rib KUR.ur-ar-ṭi šá-lil KUR.mu-ṣa-ṣi-ri ša ^mur-sa-a LUGAL KUR.ur-ar-ṭi ina pu-luḫ-ti-šu GAL-ti ina GIŠ.TUKUL ra-ma-ni-šú ú-qa-ta-a na-piš-tuš

mu-nak-kir šu-bat URU.pa-a-pa URU.la-lu-uk-ni URU.suk-ki-a URU.ba-a-la URU.a-bi-ti-ik-na ša a-na KUR.ka-ak-me-e id-bu-bu na-ba-di-iš

sa-pi-in KUR.an-di-a KUR.zi-kir-te ša gi-mir ba-ḫu-la-te-šú-nu as-li-iš ú-ṭa-bi-ḫu-ma kul-lat na-ki-ri is-lu-ḫu i-mat mu-ú-ti

ma-a-ʾu ga-mir dun-ni ù a-ba-ri mu-šék-niš KUR.ma-da-a-a la kan-šu-te šá-a-giš UN.MEŠ KUR.ḫar-ḫar.KI mu-šar-bu-ú mi-ṣir KUR aš-šur.KI

mu-pa-ḫir KUR.ma-an-na-a-a sa-ap-ḫi mu-ta-qí-in KUR.el-li-pí dal-ḫi ša LUGAL-ut KUR.KUR ki-lal-la-an ú-kin-nu-ma ú-šar-ri-ḫu zi-kir-šu

da-a-iš KUR.ḫab-ḫi ša si-mil-lat KUR-e LÚ.KÚR ek-ṣi ša ^mit-ti-i KUR.al-lab-ra-a-a ba-ra-a-nu-ú ú-še-eṣ-ṣu-ú URU-uš-šu

mu-ab-bit KUR.kar-al-la ša pa-a-ri ^mda-šur-le-ʾi LÚ.EN.URU-šú-nu il-lu-ri-iš ú-si-mu-ma ^ma-da-a KUR.šur-da-a-a e-mì-du ni-ri aš-šur

LUGAL it-pe-e-šu muš-ta-bil a-mat SIG₅-tim a-na šu-šu-ub na-me-e na-du-te ù pe-te-e ki-šub-bé-e za-qáp ṣip-pa-a-te iš-ku-nu ú-zu-un-šu

ú-ḫu-um-mi zaq-ru-ti ša ul-tu ul-la-a i-na qer-bi-šu-un ur-qi-tu la šu-ṣa-at bil-tu šu-uš-še-e ṣur-ru-uš uš-ta-bil-ma

ki-gal-lum šu-uḫ-ru-ub-tu ša i-na LUGAL.MEŠ-ni maḫ-ru-te GIŠ.APIN la i-du-ú šèr-ʾi šu-zu-zi-im-ma šul-se-e a-la-la lìb-ba-šú ub-lam-ma

in-ni ta-mir-ti la ku-up-pi ka-ra-at-tu pe-te-e-ma ki-i gi-piš e-di-i A.MEŠ nu-uḫ-ši šu-uš-qí-i e-liš ù šap-liš

LUGAL pi-it ḫa-si-si le-ʾi i-ni ka-la-ma šin-na-at ABGAL ša i-na mil-ki ù né-me-qi ir-bu-ma i-na ta-šim-ti i-še-e-ḫu

ma-at aš-šur.KI ra-pa-áš-tum ti-ʾu-ú-tu neš-bé-e ù bu-luṭ lìb-bi ti-il-li-nu-ú si-mat LUGAL-ti su-un-nu-nu ra-ṭi-šu-un

at-mu-ú re-še-e-te ša i-na su-un-qi ḫu-šaḫ-ḫi e-ṭe-ri-im-ma i-na za-bal GIŠ.GEŠTIN a-ku-ú la na-ḫar-šú-še u bi-bil lìb-bi mar-ṣi ba-ṭil-ta la ra-še-e

áš-šu Ì.MEŠ bal-ti a-me-lu-ti mu-pa-ši-iḫ šér-a-ni i-na KUR-ia la a-qa-ri-im-ma ŠE.GIŠ.Ì ki-i ^dnisaba i-na KI.LAM šá-a-mi

šu-ur-ru-uḫ nap-ta-ni si-mat GIŠ.BANŠUR DINGIR ù LUGAL ḫa-a-te-e un-na-te gi-mir ŠÁM ga-ni i-ta-te-e-šu šu-zu-zi

ur-ru ù mu-šu a-na e-peš URU šá-a-šu ak-pu-ud si-ma-ak ^dUTU DI.KU₅.GAL DINGIR.MEŠ GAL.MEŠ mu-šak-šid er-nit-ti-ia qer-bu-uš-šu šu-ub-nu-u aq-bi-ma

URU.ma-ag-ga-nu-ub-ba ša i-na GÌR.II KUR.mu-uṣ-ri KUR-e i-na UGU nam-ba-ʾi ù re-bit URU.ni-na-a ki-ma di-im-ti na-du-ú

ša 3 ME 50.ÀM mal-ki la-bi-ru-te ša el-la-mu-u-a be-lu-ut KUR aš-šur.KI e-pu-šu-ma il-ta-nap-pa-ru ba-ʾu-lat ^dEN.LÍL

a-a-um-ma i-na lìb-bi-šú-nu a-šar-šu ul ú-maš-ši-i-ma šu-šu-ub-šu ul i-de-ma ḫe-re-e ÍD-šu ul iz-ku-ur

i-na mé-re-ši-ia pal-ki ša i-na qí-bit ^dLUGAL ZU.AB EN né-me-qi ta-šim-ta su-un-nu-nu-ma ma-lu-ú nik-la-a-ti

ù ḫi-is-sa-at uz-ni-ia pal-ka-a-te ša UGU LUGAL.MEŠ-ni AD.MEŠ-ia ^dnin-men-an-na ba-nit DINGIR.MEŠ ú-šá-te-ru ḫa-si-si

a-na šu-šu-ub URU šá-a-šú zuq-qú-ur BÁRA.MAḪ-ḫi at-ma-an DINGIR.MEŠ GAL.MEŠ ù É.GAL.MEŠ šu-bat be-lu-ti-ia ur-ra u mu-šá ak-pu-ud aṣ-rim-ma e-pe-su aq-bi

ki-ma zi-kir šu-mi-ia ša a-na na-ṣar kit-ti ù mi-šá-ri šu-te-šur la le-ʾi-i la ḫa-bal en-ši im-bu-in-ni DINGIR.MEŠ GAL.MEŠ

ka-sap A.ŠÀ.MEŠ URU šá-a-šú ki-i pi-i ṭup-pa-a-te ša-a-a-ma-nu-te KÙ.BABBAR ù ZABAR.MEŠ a-na EN.MEŠ-šú-nu ú-ter-ma

áš-šu ri-ga-a-te la šub-ši-i ša ka-sap A.ŠÀ la ṣe-bu-ú A.ŠÀ mi-ḫir A.ŠÀ a-šar pa-nu-šú-nu šak-nu ad-din-šú-nu-ti

al-šu ba-ni-i-šu mé-eḫ-ret PÌRIG ŠU.DU₇ a-na ^dsig₅-ga ù ^dlugal-dingir-ra da-i-nu-te te-né-še-te ta-li-ma-ni ina te-me-qi ú-šaq-qí-ma

aḫ-ra-taš u₄-me i-na ṭu-ub lìb-bi ù bu-ʾa-a-ri qer-bu-uš-šu e-re-bi i-na SUG DIM.GAL KALAM.MA a-na ^dša-uš-ka ra-ši-bat NINA.KI at-ta-ši qa-ti

zík-ri pi-ia ke-e-nu-um ki-i ú-lu Ì UGU na-bi MAḪ.MEŠ EN.MEŠ-ia ma-aʾ-diš i-ṭí-ib-ma e-peš URU ḫe-re-e ÍD iq-bu-u-ni

na-an-nu-uš-šu-un la muš-pe-e-lu at-ta-ki-il-ma ba-ḫu-la-te-ia gap-šá-a-te ad-ke-ma al-lu tup-šik-ku ú-šá-áš-ši

i-na ITI.ṣi-i-taš ITI bi-in ^dDÀR.GAL KUD-is EŠ.BAR-e mu-šak-lim ṣa-ad-di ^dŠEŠ.KI AN-e KI-tim qar-rad DINGIR.MEŠ ^dEN.ZU

ša i-na ši-mat ^da-nim ^dEN.LÍL ù ^dé-a ^dnin-ši-kù a-na la-ba-an SIG₄.MEŠ e-peš URU ù É ITI ^dkulla na-bu-ú MU-šu

i-na UD.ÈŠ.ÈŠ ša DUMU ^dEN igi-gál-li pal-ke-e ^dAG DUB.SAR gim-ri mu-ma-ʾe-er kul-lat DINGIR.MEŠ ú-šal-bi-na lib-na-as-su

a-na ^dkulla EN uš-še li-bit-te ù ^dDÍM DÍM.GAL-lum ša ^dEN.LÍL UDU.SISKUR aq-qí sér-qu as-ru-qu-ma at-ta-ši ŠU.ÍL.KÁM

i-na ITI.NE.NE.GAR ITI a-rad ^dGIBIL₆ mu-uš-pel am-ba-te ra-ṭu-ub-te mu-kin te-me-en URU ù É uš-še-e-šú ad-di-ma ú-kin lib-na-su

pa-rak-ki ra-áš-du-ti ša ki-ma ki-ṣir ge-en-ni šur-šu-du a-na ^dé-a ^d30 ù ^dnin-gal ^dIŠKUR ^dUTU ^dMAŠ e-pu-šá qer-bu-uš-šú

É.GAL ZÚ AM.SI GIŠ.ESI GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN GIŠ.dáp-ra-ni ù GIŠ.bu-uṭ-ni ina qí-bi-ti-šú-nu ṣir-te a-na mu-šab LUGAL-ti-ia ab-ni-ma

É ḫi-la-an-ni ta-an-ši-il É.GAL KUR.ḫat-ti mé-eḫ-ret KÁ.MEŠ-šin ap-tiq-ma GIŠ.ÙR.MEŠ GIŠ.EREN GIŠ.ŠUR.MÌN ú-kin ṣe-ru-uš-šin

ŠÁR ŠÁR ŠÁR ŠÁR GÉŠ.U GÉŠ.U GÉŠ.U 1 UŠ 3 qa-ni 2 KÙŠ ni-bit MU-ia mi-ši-iḫ-ti BÀD-šu áš-kun-ma UGU NA₄ KUR-e zaq-ri ú-šar-ši-da te-me-en-šu

i-na re-e-še ù ar-ka-a-te i-na ṣe-li ki-lal-la-an mé-eḫ-ret 8 IM.MEŠ 8 KÁ.GAL.MEŠ ap-te-e-ma

^dUTU mu-šak-šid er-nit-ti-ia ^dIŠKUR mu-kil ḪÉ.GÁL-li-šu MU.MEŠ KÁ.GAL ^dUTU ù KÁ.GAL ^dIŠKUR šá IGI-et IM.KUR.RA az-ku-ur

^dEN.LÍL mu-kin iš-di URU-ia ^dNIN.LÍL mu-diš-šá-at ḫi-iṣ-bi zík-ri KÁ.GAL ^dEN.LÍL ù ^dNIN.LÍL šá IGI-et IM.SI.SÁ am-bi

^da-nu mu-šal-lim ep-šet qa-ti-ia ^diš-tar mu-šam-me-ḫat UN.MEŠ-šú ni-bit KÁ.GAL ^da-nim ù ^diš-tar šá IGI-et IM.MAR.TU áš-kun

^dé-a mu-uš-te-šir nag-bi-šu ^dbe-let-DINGIR.MEŠ mu-rap-pi-šat ta-lit-ti-šú MU.MEŠ KÁ.GAL ^dé-a ù KÁ.GAL ^dbe-let-DINGIR.MEŠ šá IGI-et IM.U₁₉.LU aq-bi-ma

^da-šur mu-lab-bir BALA.MEŠ LUGAL e-pi-ši-šu na-ṣir NUNUZ-šú BÀD-šu ^dnin-urta mu-kin te-me-en a-du-uš-ši a-na la-bar UD.MEŠ SÙ.MEŠ šal-ḫu-ú-šu

ba-ʾu-lat ar-ba-ʾi EME a-ḫi-tu at-mé-e la mit-ḫur-ti a-ši-bu-te KUR-e ù KUR mal ir-te-ʾu-ú ZÁLAG DINGIR.MEŠ EN gim-ri

ša i-na zi-kir ^da-šur EN-ia i-na mé-tel ši-bir-ri-ia áš-lu-la pa-a 1-en ú-šá-áš-kin-ma ú-šar-ma-a qé-reb-šu

DUMU.MEŠ KUR aš-šur.KI mu-du-te i-ni ka-la-ma a-na šu-ḫu-uz ṣi-bit-te pa-laḫ DINGIR ù LUGAL LÚ.ak-li LÚ.šá-pi-ri ú-ma-ʾe-er-šú-nu-ti

DINGIR.MEŠ a-ši-bu-te AN-e KI-tim ù URU šá-a-šu qí-bi-ti im-gur-ú-ma e-peš URU ù šul-bur qer-bi-šú iš-ru-ku-in-ni a-na da-riš

ša ep-šet qa-ti-ia ú-nak-kar-ú-ma bu-un-na-ni-ia ú-saḫ-ḫu-ú ú-ṣu-rat eṣ-ṣi-ru ú-šam-sa-ku si-ma-te-ia ú-pa-šá-ṭu

^da-šur ^dUTU ^dIŠKUR ù DINGIR.MEŠ a-šib lìb-bi-šú MU-šu NUMUN-šu i-na KUR lil-qu-tu-ma i-na KI.TA LÚ.KÚR-šu li-še-ši-bu-šu ka-meš