Sargon II 073

É.GAL ^mLUGAL-GI.NA šá-ak-nu ^dEN.LÍL NU.ÈŠ ^da-šur ni-šit IGI.II ^da-nim ù ^dEN.LÍL MAN dan-nu MAN KIŠ MAN KUR aš-šur.KI MAN kib-rat LÍMMU-i mi-gir DINGIR.MEŠ GAL.MEŠ

SIPA ke-e-nu šá ^da-šur ^dAMAR.UTU ut-tu-šu-ma zi-kir šu-mi-šú ú-še-ṣu-u a-na re-še-e-te

zi-ka-ru dan-nu ḫa-lip na-mur-ra-te ša a-na šum-qut na-ki-ri šu-ut-bu-u kak-ku-šu

eṭ-lu qar-du šá ul-tu u₄-um be-lu-ti-šú mal-ku GABA.RI-šú la ib-šu-ma mu-né-ḫa šá-ni-na la i-šu-ú

KUR.KUR DÙ-ši-na TA ṣi-it ^dUTU-ši a-di e-reb ^dUTU-ši i-be-lu-ma ul-taš-pi-ru ba-ʾu-lat ^dEN.LÍL

mu-ʾa-a-ru BU.BU.LU ša e-mu-qa-an ṣi-ra-a-te ^dnu-dím-mud iš-ru-ku-uš GIŠ.TUKUL la maḫ-ri uš-ṭib-bu i-du-uš-šú

NUN na-aʾ-du ša ina re-bit BÀD.AN.KI it-ti ^mdḫum-ba-ni-ga-áš LUGAL KUR.e-lam-ti in-nam-ru-ma iš-ku-nu taḫ-ta-šú

mu-šak-niš KUR.ia-ú-du šá a-šar-šú ru-ú-qu na-si-iḫ KUR.ḫa-am-ma-te ša ^mdia-ú-bi-iʾ-di ma-lik-šú-nu ik-šu-du ŠU.II-šú

mu-né-eʾ i-rat KUR.ka-ak-mé-e LÚ.KÚR lem-ni mu-ta-qi-in KUR.man-na-a-a dal-ḫu-ú-te mu-ṭib lìb-bi KUR-šú mu-rap-piš mi-ṣir KUR aš-šur

mal-ku pit-qu-du šu-uš-kal la-a ma-gi-ri ša ^mpi-si-ri LUGAL KUR.ḫat-ti ŠU-su ik-šu-du-ma UGU URU.gar-ga-miš URU-šú iš-ku-nu LÚ.UŠ-šú

na-si-iḫ URU.ši-nu-uḫ-ti ša ^mki-ak-ki LUGAL KUR.ta-ba-li a-na URU-šú aš-šur.KI ub-lam-ma KUR.mu-us-ki e-mid-du ab-šá-an-šú

ka-šid KUR.man-na-a-a KUR.kar-al-lu ù KUR.pad-di-ri mu-ter gi-mil-li KUR-šú mu-šem-qít KUR.ma-da-a-a ru-qu-ú-te a-di KUR ^dUTU-ši

i-na u₄-mi-šu-ma É.GAL GIŠ.dup-ra-ni ša URU.kal-ḫa ša ^maš-šur-ÙRU-IBILA NUN a-lik pa-ni-ia i-na pa-na e-pu-šu

ša É šu-a-tu uš-šu-šú ul dun-nu-nu-ú-ma UGU du-un-ni qaq-qa-ri ki-ṣir KUR-i ul šur-šu-da iš-da-a-šú

i-na ra-a-di ti-ik AN-e an-ḫu-ta la-bi-ru-ta il-lik-ma še-bit-su ip-pa-ṭir-ma ir-mu-ú rik-su-šú

a-šar-šú ú-ma-si-ma dan-na-su ak-šu-ud UGU NA₄.pi-i-li dan-ni tem-mé-en-šú ki-ma ši-pik KUR-i zaq-ri áš-pu-uk

TA uš-še-šú a-di gaba-dib-bi-šú ar-ṣip ú-šak-lil KÁ zi-i-qi a-na mul-ta-ʾu-ti-ia ina 2.30 KÁ-šú ap-ti

ka-šad URU.MEŠ-ni NÍG.È GIŠ.TUKUL.MEŠ-ia ša UGU LÚ.KÚR.MEŠ áš-ku-nu ina qé-reb-šú e-ṣir-ma a-na bit-re-e lu-le-e ú-mal-li-šú

^dÙRI.GAL ^dIŠKUR ù DINGIR.MEŠ a-ši-bu-ut URU.kal-ḫa a-na lìb-bi aq-re-ma GU₄.MAḪ-ḫi GAL.MEŠ UDU.NÍTA.MEŠ ma-ru-ti KUR.GI.MUŠEN.MEŠ UZ.TUR.MUŠEN.MEŠ

MUŠEN.MEŠ AN-e mut-tap-riš-ú-te ma-ḫar-šu-un aq-qi ni-gu-tú áš-kun-ma ka-bat-ti UN.MEŠ KUR aš-šur.KI ú-šá-li-iṣ

i-na u₄-me-šu-ma i-na É na-kam-te šu-a-ti 11 GUN 30 MA.NA KÙ.GI 2 LIM 1 ME GUN 24 MA.NA KÙ.BABBAR ina GAL-ti

ki-šit-ti ^mpi-si-ri LUGAL URU.gar-ga-miš ša KUR.ḫat-ti.KI ša GÚ ÍD.pu-rat-ti ša qa-ti ik-šu-du ina lìb-bi ú-še-rib